கல் குவாரியில் நீரில் மூழ்கிய தொழிலாளி உயிரிழப்பு

விருதுநகா் மாவட்டம், ராஜபாளையத்தில் கல் குவாரி நீரில் மூழ்கிய தொழிலாளி திங்கள்கிழமை உயிரிழந்தாா்.

ராஜபாளையம் தெற்கு பொன்னகரத்தைச் சோ்ந்தவா் முருகேசன் (42). தொழிலாளி. இவருக்கு மனைவி அங்காளஈஸ்வரி, இரு மகள்கள் உள்ளனா்.

இந்த நிலையில், இவா் பி.டி.ஆா். நகரில் உள்ள கல் குவாரியில் குளிக்கச் செல்வதாக மனைவியிடம் கூறிவிட்டுச் சென்றாா். ஆனால், வெகுநேரமாகியும் அவா் வீடு திரும்பவில்லை.

இதையடுத்து, அவரது உறவினா்கள் கல் குவாரிக்கு சென்று பாா்த்தபோது, முருகேசனின் மிதிவண்டி, துணிமணிகள் கரையில் இருந்தன.

இதுகுறித்து ராஜபாளையம் தீயணைப்பு நிலையத்துக்கு தகவல் தெரிவிக்கப்பட்டது. இதைத் தொடா்ந்து, அங்கு விரைந்து வந்த தீயணைப்பு வீரா்கள் கல் குவாரியில் இறங்கி முருகேசனை சடலமாக மீட்டனா்.

இதுகுறித்து ராஜபாளையம் தெற்கு காவல் நிலைய போலீஸாா் வழக்குப் பதிவு செய்து விசாரித்து வருகின்றனா்.