ஆசிரியர் தினம்

பேர்மிகு இந்தியக் குடியரசின்

பெருமை மிகுந்த தலைவரெனும்

சீர்மிகு பதவிக்குச் சிறப்புதனைச்

சேர்த்தவர் இராதா கிருட்டிணராம்!

உத்தம மான ஆசிரியர்

உழைப்பால் உயர்ந்த மாமனிதர்

தத்துவம் பயின்ற மேதையவர்

தகைசால் சிந்தனை வாதியவர்!

அன்னார் பிறந்த செப்டம்பர்

அய்ந்தாம் தேதியை நன்றியுடன்

இந்நா டாசிரியர் தினமாய்

ஏற்றுப் போற்றி வருகிறதாம்!

அந்நா ளதனில் மாணவர்கள்

ஆணித் தரமாய்ச் சூளுரைப்போம்

எந்நா ளும்இந் நாடுயர

ஏணிப் படியாய் நாமிருப்போம்!