தியாகம்

 உருகிக் கரைந்து மெழுகு வர்த்தி

 ஒளியைத் தருதல் தியாகமே

 கரிய முகிலும் மழையைப் பொழிய

 கரைந்து விடுதல் தியாகமே

 தேய்ந்து தேய்ந்து வாசம் கமழும்

 சந்த னத்தைப் போலவே

 காய்ந்து மாய்ந்து உழவு செய்யும்

 கடின உழைப்பும் தியாகமே

 அன்னை மண்ணை மீட்ப தற்கு

 அண்ணல் காந்தி தலைமையில்

 தன்னைத் தந்த திருப்பூர்க் குமரன்

 தங்கம் போன்ற தியாகிதான்

 ஊசி வாடை தாக்கி னாலும்

 ஓய்வில் லாமல் விழிப்புடன்

 தேசம் காக்கும் எல்லை வீரர்

 தினமும் தியாகம் செய்கிறார்

 உன்னைப் பெற்ற அன்னை, தந்தை

 உழைப்பு கூடத் தியாகமே

 இன்னல் என்ன வந்த போதும்

 ஏற்றுப் படிக்க வைக்கிறார்

 விட்டுக் கொடுக்கும் தியாக உணர்வு

 வீட்டில், நாட்டில் அவசியம்

 சிட்டுப் போலத் திரியும் வயதில்

 தியாகம் செய்ய விரும்புநீ!