சித்திரை வந்தது!

பார் புகழ் தமிழரின் வாழ்விலே
பற்பல விழாக்கள் இருப்பினும்
சீர்மிகு பெருமையின் சின்னமாய் 
சிறப்புடன் வந்தது சித்திரை!

முக்கனி கிடைத்திடும் பருவமும்
முத்தமிழ் முழங்கிடும் காலமும்
தக்கதோர் வாழ்த்துடன் கூடியே
இத்தரை வந்தது சித்திரை!

ஏர்த்தொழில் தொடங்கிட ஏற்ற நாள்!
எத்தொழில் செய்யவும் இனிய நாள்!
சேர்த்திடும் வளங்களும் செல்வமும்
செழித்திட வந்தது சித்திரை!

புதுமையும், பழமையும் இணைந்திட 
பொங்கும் விழாக்கள் எங்கணும்
மதுரையில் நடைபெறும் ஒரு விழா!
மண்ணில் உதாரணம் சித்திரை!

விளம்பியை அடுத்த "விகாரி' யில் 
சித்திரைப் பெளர்ணமி நாளதில்
முழுநிலாக் காண்பதை யாவரும் 
மற்றுமோர் சிறப்பெனக் கூறுவர்!

தொடங்கிய செயல்களில் மகிழவும் 
தொண்டுகள் சேவைகள் தொடரவும் 
படர்ந்திடும் எங்கும் பசுமையாய்ப்
பயன்களைத் தந்திடும் சித்திரை!