அரங்கம்: க்வாக் க்வாக்..

காட்சி : 1
இடம் : ஆகாஷின் வீடு
நேரம் : மாலை 5 மணி
மாந்தர் : அம்மா, அமிர்தா

(அம்மா யோசனையில் அமர்ந்திருக்கிறார்.)

அமிர்தா : (அங்கே வந்து) என்னம்மா, ஒரு மாதிரி இருக்கீங்க.. ?
அம்மா : ( பெருமூச்சுவிட்டு ) இந்த ஆகாஷ் பண்றதே புரியமாட்டேங்குது.. சரியான கோபக்காரனா வேற இருக்கானா, எதாவது கேட்கவே பயமாயிருக்கு..
அமிர்தா : அண்ணன் அப்படியெல்லாம் பண்ணமாட்டானே..
அம்மா : நீதான் சொல்லிக்கணும்.. உங்கப்பா காலையில நாலு மணிக்கே வேலைக்குப் போயிடறார்.. எட்டு மணிக்கு சாப்பிடறமாதிரி டிபன் கொடுத்துவிட்டா, ஆகாஷ் ஒன்பது மணிக்குத்தான் கொண்டுவந்து தர்றானாம்.. தெனமும்..
அமிர்தா : ( ஆச்சர்யமாக ) அப்படியா, குறுக்கு வழியில போறதுக்குப் பத்துப் பதினஞ்சு நிமிஷம்தானே ஆகும் ?
அம்மா : அதேதான் ! எனக்கும் இந்த விஷயம் இடிக்குது..
அமிர்தா : ம்ம்ம்.. கண்டுபுடிக்கிறேன் !

காட்சி : 2
இடம் : குறுக்குப் பாதை
நேரம் : வெவ்வேறு நேரங்கள்
மாந்தர் : ஆகாஷ், அமிர்தா, வாத்து

(மணி 7. 45 ---ஆகாஷ் டிபன் கேரியருடன் புறப்படுகிறான். அமிர்தா அவனைப் பின்தொடர்கிறாள். ----மணி 7. 50 ---ஆகாஷ் அங்கும் இங்கும் பார்த்துக்கொண்டு மெதுவாக அடி எடுத்து வைக்கிறான். ஒரு வாத்து அவனைக் கொத்த ஓடிவருகிறது.---- மணி 7. 51 ---ஆகாஷ் பதறி ஓட்டம் எடுக்கிறான். மரத்திற்குப் பின் நிற்கும் அமிர்தா சிரிக்கிறாள்.)

காட்சி : 3
இடம் : வீடு / ஹால் 1
நேரம் : முற்பகல் 11.25
மாந்தர் : ஆகாஷ், அமிர்தா
(ஆகாஷ் புத்தகத்தை மூடுகிறான்.)

அமிர்தா : (அதைப் பறித்துக்கொண்டு) எனக்கு கோதுமை பிஸ்கட் வேணும்.. உன்னோட பாக்கெட் மணியிலிருந்து வாங்கித் தா..
ஆகாஷ் : ( கோபமாக) ஏய்.. என்ன லொள்ளா ? அடிச்சன்னா பல்லு பிச்சிட்டுப் போயிரும்..
அமிர்தா : (ஏளனமாக) பல்லுப் போனாப் போகுது.. எப்படியாவது கஷ்டப்பட்டு அம்மாட்ட சொல்லிருவேன்..
ஆகாஷ் : சொல்லிட்டுப் போ.. எனக்கென்ன அம்மாவப் பார்த்தா பயமா ?
அமிர்தா : இல்லியே, வாத்தப் பார்த்தாதான் பயம்!
ஆகாஷ் : (அதிர்ந்து) பபப.. தத.. அது.. அது.. என்ன.. என்.. என்ன வாத்து ?
அமிர்தா : ம்ம்ம், தெரியாது? நீ ஏன் தெனமும் சுத்துவழியில சாப்பாடு எடுத்துட்டுப்போறே ?
ஆகாஷ் : (அதிர்ச்சியில்) ஏன்னா.. ஏன்னா.. சாப்பாடு சிந்தாம இருக்கணுமேனுதான்..
அமிர்தா : (முறைத்து) அம்மாட்ட சொல்லட்டுமா?
ஆகாஷ் : ( நாணத்துடன் ) இன்னிக்கு சாயங்காலம் கோதுமை பிஸ்கட் வேணும் அவ்ளொதானே.. வாங்கித்தரேன்..
அமிர்தா : தெனமும் சாயங்காலம் ..
ஆகாஷ் : (பேரதிர்வுடன்) ஏது???

காட்சி : 4
இடம் : வெவ்வேறு இடங்கள்
நேரம் : வெவ்வேறு நேரங்கள்
மாந்தர் : ஆகாஷ், அமிர்தா

(முதல் வாரம் : ஆகாஷ் முகக்கவசத்துடன் வீட்டுக்குள் நுழைகிறான். அவன் கையில் கோதுமை பிஸ்கட் இருக்கிறது---
இரண்டாம் வாரம் : அமிர்தா பிஸ்கட் சாப்பிடுகிறாள். ஆகாஷ் அவளை முறைக்கிறான்----
மூன்றாம் வாரம் : ஆகாஷ் காசை எண்ணிப் பார்க்கிறான். அவன் முகம் கோபத்தில் சிவக்கிறது.)

காட்சி : 5
இடம் : ஆகாஷின் வீடு / ஹால் 2
நேரம் : இரவு 8.35
மாந்தர் : ஆகாஷ், அப்பா
(ஆகாஷ் அனைத்து விஷயங்களையும் சொல்லி முடிக்கிறான்.)

அப்பா : (ஆச்சரியமாக) இதெயெல்லாம் ஏன்டா முன்னாடியே சொல்லல? அம்மாகிட்டயாவது சொல்லிருக்கலாமே!
ஆகாஷ் : (கீழே பார்த்தபடி) அம்மா என்னை எப்போமே கோபக்காரன்னு சொல்றாங்க.. இது
தெரிஞ்சா என் இமேஜ் என்னாவறது ?
அப்பா : இமேஜு ..? சரி என்னமோ.. அந்த வாத்து எப்போ வருது நான் போறப்போ இருக்கறதில்லையே?
ஆகாஷ் : ( புரியாமல்) தெர்லப்பா..
அப்பா : ம்ம்ம்.. உன்னைய ஏன் கொத்த வருது ? என்ன பண்ணின?
ஆகாஷ் : ஒருநாள் சின்னதா ஒரு கல்லை எடுத்துப் பக்கத்துல வீசினேன்.. அவ்ளொதான்.. அதுக்குப் போய் இப்பிடிப் புடிச்சிக்கிச்சு..
அப்பா : ஓ. . அதான் சுத்திவந்து லேட் பண்ணிட்டிருக்கியா.. கவலப்படாத.. ஒருவாரத்துல இதை சால்வ் பண்றேன்..
ஆகாஷ் : (ஆர்வமாக) எப்படிப்பா..?
அப்பா : வெயிட் பண்ணிப் பாரு.. ஒரே வாரம்..
(ஆகாஷ் அமைதியாகப் பார்க்கிறான்.)

காட்சி : 6
இடம் : குறுக்குப் பாதை / வெவ்வேறு இடங்கள்
நேரம் : வெவ்வேறு நேரங்கள்
மாந்தர் : அப்பா, வாத்து

இடம் 1 :
அப்பா கடையிலிருந்து கிளம்பி வருகிறார். வாத்துக்கு அருகிலிருக்கும் மரத்தின்மேல் கல்லை எறிகிறார்.
இடம் 2 :
அப்பா வாத்துக்குப் பக்கத்திலிருக்கும் குளத்திற்குள் மரத்துண்டை எறிகிறார். வாத்து சுற்றும் முற்றும் பார்க்கிறது.
இடம் 3 :
அப்பா வாத்துக்குச் சமீபமாக ஒரு சிரட்டையைப் போடுகிறார். வாத்து கோபமாக இறகைவிரித்துக்கொண்டு கத்துகிறது. அப்பா சிரிக்கிறார்.

காட்சி : 7
இடம் : வீடு / சமையலறை
நேரம் : காலை 7.25
மாந்தர் : ஆகாஷ், அம்மா, அமிர்தா

ஆகாஷ் : ம்மா.. மணி ஏழரையாச்சு.. கடையில அப்பா பசியோட இருப்பார், தெரியாதா..? சீக்கிரம் ரெடி பண்ணுங்க..
அம்மா : பொறுடா.. ஆறு மணிக்கே டிபன் ஆகிட்டாலும் நீ எப்படியோ ஒன்பது மணிக்குத்தான் கொண்டுபோய் சேர்க்கப்போறே.. அதுக்கெதுக்கு அவசரம் ..?
ஆகாஷ் : ( வம்படியாகச் சிரிக்க முயல்கிறான் ) ஹீ.. ஹீ.. ஹி.. ஹி..
அமிர்தா அவனை ஆச்சர்யமாகப் பார்க்கிறாள்.
ஆகாஷ் : ம்மா.. கேரியர்ல மட்டும் போடுங்க.. அடுத்த பத்தாவது நிமிஷம் அப்பா சாப்பிட ஆரம்பிக்கறாரா இல்லையான்னு பாருங்க..
அமிர்தா : ம்மா.. எப்பயிருந்து இவனுக்குக் கழன்டுச்சு நட்டு ?
ஆகாஷ் : அமி.. இனிமே அம்மாவக் கெஞ்சி வாங்கிக்கோ.. ஏன்னா, இன்னியிலிருந்து உனக்குக் கோதும பிஸ்கட் கட்டு!
(துள்ளிக்குதித்து ஓடும் ஆகாஷை வியப்பாகப் பார்க்கிறாள் அமிர்தா)

அம்மா : (புரியாமல்) என்ன கட்டு?

காட்சி : 8
இடம் : ஆகாஷின் வீடு / மொட்டை மாடி
நேரம் : ஒரு வாரம் கழித்து / இரவு 8.55
மாந்தர் : ஆகாஷ், அமிர்தா
(அமிர்தா கோதுமை பிஸ்கட் சாப்பிடபடி அமர்ந்திருக்கிறாள்)

ஆகாஷ் : (ஏளனமாக) ம்ம்ம்ம்.. அம்மாவக் கெஞ்சிக் கெஞ்சிக் கேட்டு பிஸ்கட் வாங்கி சாப்பிட்ற..? என்னை இனிமே ப்ளாக்மெயில் பண்ணிப் பாரு.. பல்லு பறந்துரும்..
(அமிர்தா அமைதியாக பிஸ்கட் சாப்பிடுகிறாள்.)

ஆகாஷ் : என்ன பேச்சையே காணோம் ? அந்த பயம் இருக்கட்டும்..
அமிர்தா : (நிமிர்ந்து பார்த்து) பிஸ்கட் சாப்பிடறியா..?
ஆகாஷ் : (முறைத்துவிட்டு) அம்மா வாங்கிக் குடுத்த பிஸ்கட் எனக்கெதுக்கு ? நீயே கடி..
அமிர்தா : (பிஸ்கட்டை மென்றபடி) அப்டியே அறிவுக்கொழுந்துதான்! ஃபர்ஸ்ட் ஆஃப் ஆல் இது அம்மா வாங்கிக்கொடுத்ததே இல்ல..
ஆகாஷ் : ( ஆச்சரியமாக) பின்னே..?
அமிர்தா : ( மென்றபடி) அப்பா வாங்கிக்கொடுத்தது.. டெய்லியும் கிடைக்கும்..
(ஆகாஷ் புரியாமல் தடுமாறுகிறான்.)

ஆகாஷ் : எ. . எ. . எப்டி ?
அமிர்தா : தண்ணி குடிக்க எழுந்தப்போ அவர் மூனு மணிக்குக் கிளம்பறதைப் பார்த்தேன்.. ஏன்னு கேட்டேன்.. பிஸ்கட் வாங்கிட்டுவந்தார்.
(ஆகாஷ் சிறிது நேரம் யோசிக்கிறான்)

ஆகாஷ் : ஓ.. புரிஞ்சிருச்சு.. இப்போ வாத்து அவரப் பிடிச்சிருச்சா !
அமிர்தா : யெஸ் ! டெய்லியும் கேட்டாக் கண்டிப்பாக் கிடைக்கும்..
ஆகாஷ் : எப்படியோப்பா.. சொன்ன மாதிரியே அவர் என்னோட பிரச்னையை சால்வ் பண்ணிட்டார்.. அதுபோதும்.. ஒரு பிஸ்கட் குடு..
அமிர்தா : இந்தா.. க்வாக் க்வாக்..
ஆகாஷ் : க்வாக் க்வாக்..
(இருவரும் சிரித்துக்கொண்டே கோதுமை பிஸ்கட் சாப்பிடுகிறார்கள்)

( திரை)