தாய்லாந்து குகையில் இருந்து 13 பேரும் மீட்பு: மீட்புக் குழுவைக் கொண்டாடும் மக்கள்

சியாங் ராய்: தாய்லாந்தில் வெள்ள நீர் புகுந்த குகைக்குள் கடைசியாக சிக்கியிருந்த 4 சிறுவர்கள் மற்றும் அவர்களது கால்பந்து பயிற்சியாளரை மீட்புக் குழுவினர் செவ்வாய்க்கிழமை மீட்டனர்.

இதையடுத்து, குகைக்குள் சிக்கியவர்களைப் பற்றி கடந்த 17 நாள்களாக உலகம் முழுவதும் நீடித்து வந்த பரிதவிப்பு முடிவுக்கு வந்தது.

குகைக்குள் சிக்கியவர்களை மிக மிக தீவிர முயற்சி எடுத்து, பொருட் செலவு, மனித உழைப்பு என எதையும் பொருட்படுத்தாமல், சிறுவர்களை மீட்க முழு முயற்சி மேற்கொண்ட தாய்லாந்து அரசுக்கும், தங்களது உயிரையும் பொருட்படுத்தாமல் துணிந்து மீட்புப் பணியில் ஈடுபட்டு சிக்கலான குகைப் பாதையை சிறுவர்கள் கடக்க உதவிய மீட்புக் குழுவினருக்கும் பாராட்டுகள் குவிந்து வருகின்றன.

இந்த வெற்றியை தாய்லாந்து மக்கள் இன்று கொண்டாடி வருகிறார்கள். சமூக தளங்களில் இது தொடர்பான தகவல்களையும், பாராட்டு மற்றும் கொண்டாட்ட செய்திகளையும் அவர்கள் பகிர்ந்து வருகிறார்கள்.

கடந்த 3 நாட்களாக நடந்து வந்த மீட்புப் பணியில் 13 பேரும் பத்திரமாக மீட்கப்படக் காரணமாக மீட்புக் குழுவினரின் அபாரத் திறமைக்கு நாடு முழுவதும் இருந்து பாராட்டுகள் குவிகின்றன.

கடந்த மாதம் 23-ஆம் தேதியிலிருந்து குகைக்குள் சிக்கியுள்ள 12 சிறுவர்கள் மற்றும் அவர்களது கால்பந்து வீரரை மீட்பதற்காக கடந்த 3 நாள்களாக நடைபெற்று வந்த மீட்புப் பணியின் ஒரு பகுதியாக, வெளிநாட்டு சிறப்பு நீர்மூழ்கி வீரர்களின் உதவியுடன் தாய்லாந்து கடல் அதிரடிப்படையினர் குகைக்குள் செவ்வாய்க்கிழமையும் நுழைந்தனர்.

அதனைத் தொடர்ந்து, ஆபத்துகள் நிறைந்த, வெள்ள நீரில் மூழ்கியிருக்கும் மிகவும் குறுகலான குகைப்பாதை வழியாக, அங்கு கடைசியாக சிக்கியிருந்த 4 சிறுவர்களையும், 25 வயது கால்பந்து பயிற்சியாளரையும் மீட்புக் குழுவினர் கடும் சிரமத்துக்கிடையில் அழைத்து வந்தனர்.

இதுகுறித்து முகநூல் வலைதளத்தில் தாய்லாந்து கடல் அதிரடிப்படை வெளியிட்டுள்ள பதிவில் தெரிவிக்கப்பட்டுள்ளதாவது:

குகைக்குள் சிக்கியிருந்த வைல்டு போர்ஸ்' கால்பந்து அணியைச் சேர்ந்த 12 சிறுவர்கள், அவர்களது பயிற்சியாளர்கள் ஆகிய 13 பேரும் மீட்கப்பட்டுவிட்டனர்.

மீட்கப்பட்ட அனைவரும் பத்திரமாக உள்ளனர் என்று அந்தப் பதிவில் குறிப்பிடப்பட்டுள்ளது.

தாய்லாந்தில், 11 முதல் 16 வயது வரை கொண்ட 12 சிறுவர்களை, அவர்களது 25 வயது கால்பந்து பயிற்சியாளர் சியாங் ராய் என்னும் பகுதிக்கு கடந்த மாதம் 23-ஆம் தேதி சுற்றுலா அழைத்துச் சென்றார்.

அப்போது அந்தப் பகுதியிலுள்ள, பல கி.மீ. நீளம் கொண்ட குகையைப் பார்வையிட, அந்த 13 பேரும் அதற்குள் சென்றுள்ளனர். எனினும், திடீரென பெய்த பெரு மழை காரணமாக அந்த குகைக்குள் வெள்ளம் புகுந்தது.

அதனால் வெளிச்சமும், வெளியேறும் வழியும் இல்லாமல் அவர்கள் குகைக்குள் சிக்கிக் கொண்டனர். அவர்களைத் தேடி அந்தப் பகுதிக்கு வந்த மீட்புக் குழுவினர், குகை வாயிலில் அவர்களது மிதிவண்டி உள்ளிட்ட பொருள்கள் இருப்பதை வைத்து அந்தக் குகைக்குள் அவர்கள் சென்றிருப்பதை உறுதி செய்தனர்.

எனினும், தொடர்ந்து பெய்து வந்த கன மழை மற்றும் வெள்ளம் காரணமாக குகைக்குள் சென்று அவர்களை மீட்பதில் சிரமம் ஏற்பட்டது.

இந்தத் தகவல், தாய்லாந்து முழுவதும் நெகிழ்ச்சியை ஏற்படுத்தியது. குகைக்குள் மாயமான சிறுவர்களும், அவர்களது பயிற்சியாளரும் உயிருடன் மீட்கப்பட வேண்டும் என்று நாடு முழுவதும் பிரார்த்தனை செய்யப்பட்டன.

இந்தச் சூழலில், தேடுதல் பணியில் ஈடுபட்டிருந்த பிரிட்டன் நீச்சல் வீரர் ஒருவர் குகையின் பாறை மேடு ஒன்றில் அந்த 13 பேரையும் 9 நாள்களுக்குப் பிறகு கண்டறிந்தார்.

பசி மற்றும் களைப்பால் மிகவும் சோர்வுற்றும், மெலிந்தும் காணப்பட்ட அவர்கள் அந்த வீரரிடம் பேசிய விடியோவை தாய்லாந்து கடல் அதிரடிப்படை வெளியிட்டது.

அதன் தொடர்ச்சியாக, அவர்களுக்கு உணவு, மருந்துகள் மற்றும் அத்தியவசியப் பொருள்கள் அனுப்பப்பட்டன.

குகைக்குள் சிறுவர்கள் இருக்குமிடம் கண்டறியப்பட்டாலும், குகைக்குள் ஓடும் வெள்ள நீர் மற்றும் சகதியில் நீந்தி வர அவர்களுக்கு சிறப்பு நீச்சல் பயிற்சி அளிக்கப்பட வேண்டும்; அல்லது குகையில் வெள்ள நீர் வடியும் வரை காத்திருந்து அவர்களை வெளியே அழைத்து வரலாம் என்று மீட்புக் குழுவினர் தெரிவித்தனர்.

எனினும், அதற்கு பல மாதங்கள் ஆகலாம் என்று கூறப்பட்டது.

இந்த நிலையில், அந்த 13 பேரும் குறுகலான குகைப் பாதையில் தேங்கியிருக்கும் வெள்ள நீரில் நீந்தி வருவதற்கு உடலளவிலும், மனதளவிலும் 100 சதவீதம் தயாரான பிறகு, ஒவ்வொருவராக குகையிலிருந்து மீட்கப்படுவார்கள் என்று அதிகாரிகள் தெரிவித்தனர்.

இதற்கிடையே, ஆக்ஸிஜன் குறைபாடு காரணமாக மீட்புப் பணியில் ஈடுபட்டிருந்த தாய்லாந்து கடல் அதிரடிப் படை முன்னாள் வீரர் உயிரிழந்தார்.

இந்த நிலையில், அந்தப் பகுதியில் மீண்டும் பலத்த மழை பெய்யத் தொடங்கியதைத் தொடர்ந்து, குகைக்குள் மேலும் வெள்ள நீர் புகும் அபாயம் ஏற்பட்டது. மேலும், குகைக்குள் பிராண வாயு (ஆக்ஸிஜன்) அளவும் வெகுவாகக் குறைந்து வந்தது.

இதையடுத்து, அந்த 13 பேரையும் உடனடியாக வெளியேற்ற வேண்டிய நிலை ஏற்பட்டதையடுத்து, மீட்புக் குழுவினர் ஞாயிற்றுக்கிழமை 4 சிறுவர்களும், திங்கள்கிழமை 4 சிறுவர்களும் மீட்டனர். இந்த நிலையில், தற்போது கடைசியாக இருந்த மேலும் 5 பேர் பத்திரமாக மீட்கப்பட்டுள்ளது தாய்லாந்திலும், பிற நாடுகளிலும் மகிழ்ச்சி அலையை ஏற்படுத்தியுள்ளது.

அந்த 17 நாள்கள்...