தாய்லாந்தில் மழை வெள்ளம்: 13 பேர் பலி

தாய்லாந்தில் கடந்த சில தினங்களாகப் பெய்து வந்த மழை வெள்ளத்தில் சிக்கி இதுவரை 13 பேர் பலியாகி இருப்பதாக அந்நாட்டு அரசு தெரிவித்துள்ளது.

தாய்லாந்து நாட்டின் நகோன் சி தம்மரத் மாகாணத்தில் கடந்த சில தினங்களாக பலத்த மழை பெய்து வருகிறது. இதனால் அப்பகுதி வெள்ளத்தில் மூழ்கியுள்ளது. தொடர்ச்சியாகப் பெய்து வரும் மழையால் அப்பகுதி மக்கள் வீடுகளை விட்டு வெளியில் வர முடியாத நிலையில் உள்ளனர்.

இந்நிலையில் சனிக்கிழமை வெள்ளபாதிப்பு குறித்து தேசிய பேரிடர் தடுப்பு ஆணையம் அறிக்கை வெளியிட்டது. அதன்படி இதுவரை மழை வெள்ளத்தில் சிக்கி 13 பேர் பலியாகியுள்ளதாகத் தெரிவிக்கப்பட்டுள்ளது.

ஆறு மாகாணங்களில் உள்ள 66 மாவட்டங்கள் மழையால் பாதிக்கப்பட்டுள்ளன. 2,680 கிராமங்களில் மொத்தம் 3,21,057 வீடுகள் வெள்ள பாதிப்பில் சிக்கியுள்ளன.