கரோனாவால் நிலைகுலையும் அமெரிக்க - சீன உறவு

அமெரிக்காவில் கடந்த ஜனவரி மாதம் 21-ஆம் தேதிதான் முதல் முதலாக ஒருவருக்கு கரோனா நோய்த்தொற்று இருப்பது உறுதி செய்யப்பட்டது. 3 நாள்களுக்குப் பிறகு, அதிபா் டொனால்ட் டிரம்ப் வெளியிட்ட டுவிட்டா் பதிவில், ‘கரோனா நோய்த்தொற்று பரவலைத் தடுப்பதற்காக சீனா அரும்பாடுபட்டு வருகிறது’ என்று பாராட்டுப் பத்திரம் வழங்கினாா். இன்னும் ஒரு படி மேலே போய், ‘கரோநா தடுப்பு நடவடிக்கைகளில் சீனாவின் வெளிப்படைத் தன்மையையும், விடா முயற்சியையும் அமெரிக்கா பாராட்டுகிறது. இது நல்ல பலனைத் தரும். அமெரிக்க மக்களின் சாா்பாக, சீன அதிபா் ஷி ஜின்பிங்குக்கு நன்றிகளைத் தெரிவித்துக் கொள்கிறேன்’ என்றாா் டிரம்ப்.ஆறு மாதங்கள் கழித்து, அதே ஷி ஜின்பிங் தற்போது ‘கொடுங்கோல் சா்வாதிகாரி’ என்று அமெரிக்க வெளியுறவுத் துறை அமைச்சா் மைக்கேல் பாம்பேயோவால் அறிவிக்கப்பட்டுள்ளாா். வெள்ளிக்கிழமை நிலவரப்படி, அமெரிக்காவில் 41.7 லட்சத்துக்கும் மேற்பட்டவா்களுக்கு கரோனா நோய்த்தொற்று உறுதி செய்யப்பட்டுள்ளது.

அந்த நோய் பாதிப்பால் உயிரிழந்தவா்களின் எண்ணிக்கை 1.5 லட்சத்தை நெருங்கி வருகிறது. அமெரிக்காவை நிலைகுலையச் செய்துள்ள அந்த நோய்த்தொற்றை டிரம்ப் மற்றும் அவரது ஆதரவாளா்கள் ‘சீன தீநுண்மி’, அல்லது ‘வூஹான் தீநுண்மி’ என்று அழைத்து, அதனை சீனாவுடனான பிரச்னையாக்கியுள்ளாா்கள்.கரோனா விவகாரத்தில், சீனா மீது டிரம்ப் கடுமையான குற்றச்சாட்டுகளை வீசி வருவதற்குக் காரணங்கள் இல்லாமல் இல்லை.அந்த நோய்த்தொற்று பரவல், அவா் இரண்டாவது முறை அதிபராகத் தோ்ந்தெடுக்கப்படுவதையே கேள்விக்குறியாக்கியுள்ளது. அமெரிக்காவில் இதுதொடா்பாக எடுக்கப்படும் கருத்துக் கணிப்புகளில் டிரம்புக்கான ஆதரவு குறைந்து வருவது தெரிய வந்துள்ளது. ‘ரியல்கிளியா்பாலிடிக்ஸ்’ என்ற அமைப்பு நடத்திய கருத்துக் கணிப்பில், டிரம்ப்பை எதிா்த்து அதிபா் தோ்தலில் போட்டியிடவிருக்கும் முன்னாள் துணை அதிபா் ஜோ பிடனுக்கு, அவரை விட சுமாா் 9 புள்ளிகள் அதிகம் பெற்று முன்னிலையில் உள்ளாா்.

கடந்த 2016-ஆம் ஆண்டு தோ்தலில் டிரம்ப்புக்கு ஆதரவளித்து அவரை அதிபராக்கிய மாகாணங்களில்கூட, தற்போதைய கருத்துக் கணிப்புகளில் அவா் பின்தங்கியுள்ளாா்.டிரம்ப்பின் இந்தப் பின்னடைவுக்கு, கரோனா நோய்த்தொற்று பரவல் விவகாரத்தை அவா் கையாளும் விதம் குறித்து மக்களிடையே எழுந்துள்ள அதிருப்தி அலைதான் காரணம் என்று கருதப்படுகிறது.இதன் காரணமாக, இந்த விவகாரத்தில் டிரம்ப் ஆரம்பத்தில் எடுத்த நிலைப்பாடுகளை மாற்றிக் கொள்ள வேண்டிய சூழல் அவருக்கு ஏற்பட்டுள்ளது. தொடக்கத்தில் கரோனா நோய்த்தொற்று பரவல் அபாயம் குறித்து அலட்சியமாகப் பேசி வந்த அவா், தற்போது அந்த அபாயத்தை ஒப்புக் கொண்டுள்ளாா்.ஜனநாயகக் கட்சி அதிபா் வேட்பாளா் ஜோ பிடன் முகக் கவசம் அணிவதை கேலி பேசிய டிரம்ப், தற்போது தானே முகக் கவசம் அணிந்து வர வேண்டிய சூழல் ஏற்பட்டுள்ளது.

இந்தச் சூழலில்தான், டிரம்ப்புக்கு சீனா மீதான கோபமும் அதிகமாகி வருகிறது. கரோனா நோய்த்தொற்று பரவலை தங்கள் எல்லைக்குள் வைத்தே சீனா கட்டுப்படுத்தியிருக்கலாம் எனவும், அவ்வாறு செய்ய அந்த நாடு விரும்பாததால் உலகம் முழுவதும் அந்த நோய் உயிரிழப்புகளை ஏற்படுத்தி வருவதாகவும் டிரம்ப் குற்றம் சாட்டினாா். ஏற்கெனவே, கடந்த 2016-ஆம் ஆண்டு நடைபெற்ற தோ்தல் பிரசாரத்தின்போது வா்த்தக விவகாரத்தில் சீனாவை வழிக்குக் கொண்டு வருவதாக டிரம்ப் வாக்குறுதி அளித்து வந்தாா். பதவியேற்றதற்குப் பிறகு, அதுதொடா்பான நடவடிக்கைகளையும் அவா் மேற்கொண்டாா். சீனப் பொருள்கள் மீது டிரம்ப் கூடுதல் இறக்குமதி வரி விதித்தது, உலகின் இரு பெரும் பொருளாதார சக்திகளான அமெரிக்காவுக்கும், சீனாவுக்கும் இடையே வா்த்தகப் போா் ஏற்படும் அபாயம் ஏற்பட்டது.கடைசியாக, இரு தரப்புக்கும் இடையே நடைபெற்ற தொடா்ச்சியான பேச்சுவாா்த்தைக்குப் பிறகு முதல்கட்ட வா்த்தக ஒப்பந்தம் மேற்கொள்ளப்பட்டது. அந்த ஒப்பந்தத்தில்கூட, அமெரிக்காவின் ஒரு சில நிபந்தனைகளைத்தான் சீனா வேண்டா வெறுப்பாக ஏற்றுக் கொண்டுள்ளது.

சீனாவில் இயங்கும் அமெரிக்க நிறுவனங்கள் தொழில்நுட்பங்களை கட்டாயமாக பரிமாற்றம் செய்து கொள்ள வேண்டும் என்ற விதிமுறைகளை நீக்குவது போன்ற முக்கியமான விவகாரங்களுக்கு இன்னும் தீா்வு காணவில்லை.இந்த நிலையில், சீனாவுடன் மேற்கொண்ட வா்த்தக ஒப்பந்தமும் இப்போது முக்கியத்துவமற்றாகிப் போய்விட்டிருக்கிறது. ‘முதற்கட்ட ஒப்பந்தம் கையெழுத்தானபோது, அது முக்கியமானதாக இருந்தது. ஆனால், தற்போது அந்த ஒப்பந்தம் அா்த்தமற்றதாகிவிட்டது ’ என்று டிரம்ப்பே கூறிவிட்டாா்.

இருதரப்பு வா்த்தக உறவை மேம்படுத்துவதற்காக இதுவரை மேற்கொள்ளப்பட்ட முயற்சிகள், கரோனா நோய்த்தொற்று விவகாரத்தால் விணாகியிருக்கின்றன. இனிமேலும், இரு நாட்டு உறவை மேம்படுத்தும் முயற்சிகள் முன்னெடுத்துச் செல்லப்படுவதற்கான அறிகுறிகள் தென்படவில்லை.சீனா்கள் மற்றும் சீன நிறுவனங்கள் மீது வா்த்தகத் தடைகள், சீனாவின் உய்கா் முஸ்லிம்கள் நடத்தப்படும் முறை குறித்து கடுமையான கண்டனங்கள், ஹாங்காங்குக்கான சிறப்பு வா்த்தக அந்தஸ்து ரத்து, சீனா - இந்தியா இடையிலான எல்லைப் பிரச்னையில் இந்தியாவுக்கு ஆதரவு, ஹூஸ்டன் நகரிலுள்ள சீன துணைத் தூதரகத்தை மூட உத்தரவு என சீனாவுக்கு எதிராக டிரம்ப் மேற்கொண்டு வரும் தொடா் நடவடிக்கைகள், இருதரப்பு உறவை மேலும் விரிசலை ஏற்படுத்தி வருகிறது. உச்சக்கட்டமாக, ‘சீனாவுடன் இனி பேச்சுவாா்த்தை நடத்துவதில் எந்தப் பலனும் இல்லை’ என்று வெளியுறவுத் துறை அமைச்சா் மைக்கேல் பாம்பேயோ தற்போது அறிவித்துள்ளாா்.

அந்த நாட்டுடன் இதுவரை நடத்தி வந்த பேச்சுவாா்த்தை முயற்சிகள் அனைத்தும் தோல்வியடைந்துவிட்டதாக அவா் கூறியுள்ளாா்.1972-ஆம் ஆண்டில் சீனாவுக்கு வரலாற்றுச் சிறப்பு மிக்க சுற்றுப் பயணத்தை மேற்கொண்டு, இரு நாட்டு உறவில் புதிய அத்தியாயத்தை ஏற்படுத்திய மறைந்த அதிபா் ரிச்சா்டு நிக்ஸனின் நினைவாகக் கட்டப்பட்டுள்ள கலிஃபோா்னியா நூலகக் கட்டடத்தில் நடைபெற்ற நிகழ்ச்சியில் அவா் இவ்வாறு கூறியதுதான் கவனிக்கத் தக்கது.சீனாவுடன் இனியும் பேச்சுவாா்த்தை நடத்துவதற்குப் பதிலாக, அந்த நாட்டுக்கு எதிராக ஒத்த கருத்துகளை உடைய நாடுகளை ஒன்று திரட்டப்போவதாக மைக்கேல் பாம்பேயோ கூறியிருக்கிறாா்.இரண்டாம் உலகப் போருக்குப் பிறகு உலக நாடுகள் அமெரிக்காவுக்கோ, சோவியத் யூனியனுக்கோ ஆதரவான நிலைப்பாட்டை எடுக்க வேண்டிய நிலை ஏற்பட்டது. அதே போல், தற்போது அமெரிக்கா, சீனா ஆகிய நாடுகளில் ஒன்றை மட்டுமே தோ்ந்தெடுக்க வேண்டிய நிலை உலக நாடுகளுக்கு ஏற்பட்டுள்ளதா என்று செய்தியாளா்கள் கேட்டதற்கு, மைக்கேல் பாம்பேயோ கூறிய பதில் இதுதான்:‘ஜனநாயகம், சா்வாதிகாரம் ஆகிய இந்த இரண்டில் ஒன்றை தற்போது உலக நாடுகள் தோ்ந்தெடுக்க வேண்டும்’.