ஐரோப்பிய ஒன்றிய ஆணைய தலைவர் உக்ரைன் பயணம்

ரஷியப் படையினர் தாக்குதல் தொடரும் நிலையில் போர் நிலவரங்களை அறிய ஐரோப்பிய ஒன்றிய ஆணையத்தின் தலைவர் உக்ரைன் செல்ல உள்ளார்.

உக்ரைன் மீதான ரஷியாவின் தாக்குதல் ஒரு மாதத்திற்கும் மேலாக  தொடர்ந்து வருகிறது. உக்ரைனின் பல்வேறு பகுதிகளைக் கைப்பற்றி வரும் ரஷியப்படையினர் உக்ரைன் மக்களையும் தாக்குவதாக உக்ரைன் குற்றம்சாட்டி வருகிறது. 

குறிப்பாக, உக்ரைனின் அனைத்துப் பகுதிகளையும் முழுமையாகக் கைப்பற்ற ரஷியா தொடர் முயற்சிகளில் ஈடுபட்டு வருதால் போரால் பலரும் இயல்பு வாழ்வை இழந்து வருகிறார்கள்.

தலைநகர் கீவ் அருகே புச்சா என்ற பகுதியில் நேற்று முன்தினம் 400க்கும் மேற்பட்ட  உடல்கள் கைப்பற்றப்பட்டுள்ளதாகவும் ரஷியப்படையினர் செய்தது இனப்படுகொலை என்றும் உக்ரைன் தரப்பு குற்றம்சாட்டியது. இதற்கு உலக நாடுகளின் தலைவர்களும் கண்டனம் தெரிவித்துள்ளனர்.

இந்நிலையில், இந்த வார இறுதியில் உக்ரைனில் ரஷியா ஏற்படுத்திய சேதங்கள் குறித்தும், போர் நிலவரங்களை அறியவும் ஐரோப்பிய ஒன்றிய ஆணையத்தின் தலைவர் வெர்சுலா வொன் டார் லெயன் உக்ரைன் செல்ல உள்ளதாக தகவல் வெளியாகியுள்ளது.

முன்னதாக, ஐரோப்பிய நாடாளுமன்றத் தலைவர் ராபர்ட்டா மெட்சோலா கடந்த வாரம் உக்ரைன் சென்றது குறிப்பிடத்தக்கது.