பிரிட்டன் பிரதமா் தோ்தல்:ரிஷி சுனக்கின் வெற்றி வாய்ப்பு பாதிப்பு: ஆதரவாளா்கள் கருத்து

பிரிட்டன் பிரதமா் தோ்தலையொட்டி, பிரசாரத்தின்போது கலிஃபோா்னியாவை மேற்கோள்காட்டி கருத்து தெரிவித்ததால், ரிஷி சுனக்கின் வெற்றிவாய்ப்பு பாதிக்கப்பட்டுள்ளதாக அவரது ஆதரவாளா்கள் தெரிவித்துள்ளனா்.

பிரிட்டனின் ஈஸ்ட்போா்ன் பகுதியில் கடந்த ஆகஸ்ட் 5-இல் கன்சா்வேட்டிவ் கட்சி உறுப்பினா்கள் மத்தியில் ரிஷி சுனக் பிரசாரம் செய்தாா். அப்போது, ‘நீங்கள் இளம் பட்டதாரியாக இருந்தால், உங்களது வாழ்வை எப்படி அமைத்துக் கொள்வீா்கள்?’ எனக் கேள்வி எழுப்பப்பட்டது.

இதற்கு ரிஷி சுனக் பதிலளிக்கையில், தான் அமெரிக்காவின் கலிஃபோா்னியா மாகாணம் ஸ்டான்ஃபோா்டு பல்கலைக்கழகத்தில் கடந்த 2004 முதல் 2006 வரை படித்த நாள்களை நினைவுகூா்ந்தாா்.

அவா் கூறுகையில், ‘கலிஃபோா்னியாவின் சிலிகான் பள்ளத்தாக்கில் வாழ்ந்த நாள்கள் உத்வேகமும் அதிகாரமும் அளிப்பவை. நான் இப்போது இளவயதில் இருந்திருந்தால், அங்கே சென்று ஏதாவது செய்ய விரும்புவேன்’ என்றாா். மேலும், 10 நிமிஷங்களில் மூன்று முறை கலிஃபோா்னியா மாகாண பெயரை அவா் உச்சரித்தாா்.

இது அவரது ஆதரவாளா்கள் மத்தியில் அதிருப்தியை ஏற்படுத்தியுள்ளது. மேலும் கன்சா்வேட்டிவ் கட்சியின் உறுப்பினா்களுடன் அவா் தொடா்பில் இல்லாததையே இந்தக் கருத்து வெளிப்படுத்துவதாக சென்ட்ரல் லண்டனில் உள்ள ரிஷி சுனக்கின் ஆதரவாளா்கள் தெரிவித்துள்ளனா்.

இதுகுறித்து ‘தி டெய்லி டெலிகிராப்’ நாளிதழுக்கு அவா்கள் அளித்த பேட்டியில், ‘ரிஷி சுனக் பிரதமா் தோ்தலில் வெற்றி பெற மாட்டாா் என மக்கள் பேசத் தொடங்கிவிட்டனா். அவா் கலிஃபோா்னியா குறித்தும், தொழில்நுட்பம் குறித்தும் பேசுவதை வாடிக்கையாக கொண்டுள்ளாா். எனவே, அவா் தோ்தலில் வெற்றி பெறப் போவதில்லை என்பது தெளிவாகிறது’ என்று கூறினா்.