பாகிஸ்தான் நாடாளுமன்ற பொதுத் தோ்தல் 2024, ஜனவரி கடைசி வாரம் நடைபெறும் என தோ்தல் ஆணையம் வியாழக்கிழமை அறிவித்தது.
பாகிஸ்தான் முஸ்லிம் லீக் (என்) கட்சி தலைமையிலான கூட்டணி ஆட்சி பாகிஸ்தானில் நடைபெற்று வந்தது. அக்கட்சியின் தலைவா் ஷாபாஸ் ஷெரீஃப் பிரதமராக இருந்த நிலையில், நாடாளுமன்றம் அதன் பதவிக் காலம் நிறைவடைவதற்கு மூன்று நாள்கள் முன்னதாக கடந்த ஆக. 9-ஆம் தேதி கலைக்கப்பட்டது.
பாகிஸ்தான் அரசமைப்புச் சட்டப்படி அடுத்த பொதுத் தோ்தல் 90 நாள்களுக்குள் நடத்தப்பட வேண்டும். ஆனால், அங்கு நிகழாண்டு நடத்தப்பட்ட மக்கள்தொகை கணக்கெடுப்பு அடிப்படையிலான தொகுதி மறுவரையறை நிறைவடையாததால் தோ்தல் அறிவிப்பை வெளியிடுவதில் தோ்தல் ஆணையம் தாமதித்து வந்தது.
இந்நிலையில், பொதுத் தோ்தல் குறித்த அறிவிப்பை ஆணையம் வெளியிட்டுள்ளது. அதில் கூறியிருப்பதாவது: தொகுதி மறுவரையறையின் முதல்கட்ட பட்டியல் செப். 27-ஆம் தேதி வெளியிடப்படும். தொகுதி மறுவரையறை தொடா்பான கட்சிகளின் ஆட்சேபங்களுக்கு தீா்வு கண்ட பிறகு இறுதிப் பட்டியல் நவ. 30-ஆம் தேதி வெளியிடப்படும்.
அதன் பின்னா் தோ்தல் அறிவிக்கை வெளியிடப்பட்டு, ஜனவரி கடைசி வாரத்தில் பொதுத் தோ்தல் நடத்தப்படும் என தோ்தல் ஆணையம் தெரிவித்துள்ளது.
பாகிஸ்தானில் தற்போது இடைக்கால பிரதமராக ஆளும் கூட்டணிக் கட்சியான பலூசிஸ்தான் அவாமி லீக்கை சோ்ந்த அன்வருல் கக்காா் இருந்து வருகிறாா். பொதுத் தோ்தல் நிறைவடைந்து புதிய பிரதமா் தோ்வு செய்யப்படும் வரை அவா் பதவியில் தொடா்வாா்.
ஊழல் வழக்கில் தண்டனை விதிக்கப்பட்டு சிறையில் அடைக்கப்பட்டுள்ள முன்னாள் பிரதமா் இம்ரான் கானின் பாகிஸ்தான்-ஏ-இன்சாஃப் கட்சியின் நிறுவன உறுப்பினரும் நாட்டின் அதிபருமான ஆரிஃப் ஆல்வி, நவ. 6-ஆம் தேதி பொதுத் தோ்தலை நடத்த வேண்டுமென பரிந்துரை செய்திருந்தாா். ஆனால், அவரது யோசனை தொடா்பாக தோ்தல் ஆணையம் எந்தக் கருத்தையும் தெரிவிக்கவில்லை.