5 ஆண்டுகளும் கூட்டணி அரசு பதவி வகிக்கும்: துணை முதல்வர் ஜி.பரமேஸ்வர்

கர்நாடகத்தில் அடுத்த ஆண்டுகளுக்கு மஜத-காங்கிரஸ் கூட்டணி அரசு பதவிவகிக்கும் என்று துணை முதல்வர் ஜி.பரமேஸ்வர் தெரிவித்தார்.
பெங்களூரில் அவர் புதன்கிழமை செய்தியாளர்களிடம் கூறியது:-
முதல்வர் குமாரசாமி தலைமையிலான மஜத-காங்கிரஸ் கூட்டணி அரசு, ஆகஸ்ட் 30-ஆம் தேதியுடன் 100 நாள்களை நிறைவு செய்கிறது. 
கூட்டணி அரசு கவிழும் என்று பாஜக எதிர்பார்த்திருக்கிறது. ஆனால் 100 நாள்கள் ஆட்சிக்காலத்தை நிறைவுசெய்துள்ள மஜத-காங்கிரஸ் கூட்டணி அரசு, அடுத்த 5 ஆண்டுகளுக்கு பதவியில் நீடிக்கும். 
முந்தைய காங்கிரஸ் ஆட்சியில் அப்போதைய முதல்வர் சித்தராமையா செயல்படுத்திய திட்டங்கள் அனைத்தும் தொடர்ந்துள்ளது.  மேலும் 3 மாதகால ஆட்சியில் பல புதிய திட்டங்களையும் கொண்டுவந்துள்ளது. 
விவசாயிகள் தனியார் அமைப்புகள், தனிநபர்களிடம் இருந்துபெறப்பட்ட கடன் தவிர, தேசிய வங்கி, கூட்டுறவு வங்கிகளில் பெற்றுள்ள ரூ.31 ஆயிரம் கோடிமதிப்பிலான பயிர்க்கடனை அரசு தள்ளுபடி செய்துள்ளது. 
கர்நாடக மாநிலத்தின் 13 மாவட்டங்கள் கடுமையான வறட்சியால் அவதிப்படும் நிலையில், குடகு , சிக்மகளூரு, தென்கன்னட மாவட்டங்கள் பெருவெள்ளம் ஏற்பட்டுள்ளது. இந்த மாவட்டங்களில் அவதியுற்ற மக்களுக்குத் தேவையான உதவிகளை கர்நாடக அரசு உடனடியாக வழங்கியுள்ளது. 
குடகு மாவட்டத்துக்கு வெள்ளநிவாரண உதவிகளை வழங்காமல் மத்திய அரசு அலட்சியப்படுத்தியுள்ளது.  கேரளத்தில் வெள்ளப் பாதிப்புகளை பார்வையிட்ட பிரதமர் மோடி, குடகு மாவட்டத்தில் வெள்ளபாதிப்புகளை பார்வையிட தவறிவிட்டார். முதல்வர் குமாரசாமி, வியாழக்கிழமை புதுதில்லிக்கு சென்று மத்திய உள்துறை அமைச்சர் ராஜ்நாத்சிங்கை சந்தித்து நிதியுதவி கேட்கவிருக்கிறார். வெள்ளநிவாரணநிதியாக ரூ.2 ஆயிரம் கோடி அளிக்குமாறுமத்திய அரசுக்கு ஏற்கெனவே வேண்டுகோள் விடுத்துள்ளோம். 
பெங்களூருவில் சட்டவிரோதமாக பதித்திருந்த 8கிமீ நீளத்திற்கான கேபிளை அகற்றியுள்ளோம். பெங்களூருவில் ரூ.13,500கோடியில் வெளிவட்டசாலை அமைக்கப்படும். அதற்கான பணிகள் வெகுவிரைவில் தொடங்கும் என்றார் அவர்.