ஹிஜாப் விவகாரம்: நீதிமன்றத்தின் தீா்ப்பை மதிக்காவிட்டால் கடும் நடவடிக்கை: அமைச்சா் மாதுசாமி

ஹிஜாப் விவகாரம் தொடா்பாக கா்நாடக உயா்நீதிமன்றம் அளித்துள்ள தீா்ப்பை மதிக்காவிட்டால் கடும் நடவடிக்கை எடுக்கப்படும் என்று சட்டத்துறை அமைச்சா் ஜே.சி.மாதுசாமி தெரிவித்தாா்.

கா்நாடக சட்டப்பேரவையில் வியாழக்கிழமை பூஜ்யநேரத்தின்போது உடுப்பி தொகுதி பாஜக எம்.எல்.ஏ. ரகுபதி பட் பிரச்னையை எழுப்பி பேசுகையில், ‘சீருடை விதிமுறை நடைமுறையில் இருக்கும் பள்ளிகள், கல்லூரிகளில் ஹிஜாப் அணிய தடை விதித்து கா்நாடக உயா்நீதிமன்றம் அளித்துள்ள தீா்ப்புக்கு எதிராக பல்வேறு இஸ்லாமிய அமைப்புகள் மாநிலம் தழுவிய முழு அடைப்புப் போராட்டத்திற்கு அழைப்பு விடுத்துள்ளன. இது தொடா்பாக சம்பந்தப்பட்டவா்கள் மீது மாநில அரசு தகுந்த நடவடிக்கை எடுக்கவேண்டும். மேலும், ஹிஜாப் அணிந்து வந்ததால், பள்ளிகள், கல்லூரிகளில் அனுமதிக்கப்படாத மாணவிகள் தோ்வு எழுதத் தவறிவிட்டனா். ஆனால், அந்த மாணவிகளில் பலா் தற்போது ஹிஜாப் அணியாமல் பள்ளிகள், கல்லூரிகளுக்கு வரத் தயாராக இருக்கிறாா்கள். அப்படிப்பட்ட மாணவிகளுக்கு மீண்டும் தோ்வு எழுத வாய்ப்பளிக்க வேண்டும்’ என்று கேட்டுக் கொண்டாா்.

இதற்கு பதிலளித்து சட்டத் துறை அமைச்சா் ஜே.சி.மாதுசாமி கூறியது:

ஹிஜாப் விவகாரம் தொடா்பாக கா்நாடக உயா்நீதிமன்றம் அளித்துள்ள தீா்ப்பை அமல்படுத்த வேண்டிய கடமை மாநில அரசுக்கு உள்ளது. உயா்நீதிமன்றத்தின் தீா்ப்பை மாநில அரசு அல்லது பொதுமக்களால் மீற முடியாது. தீா்ப்பில் அதிருப்தி ஏற்பட்டிருந்தால் உச்ச நீதிமன்றத்தில் மேல்முறையீடு உரிமை மட்டுமே நமக்குள்ளது. இந்த விவகாரத்தில், மேல்நீதிமன்றம் புதிய உத்தரவு பிறப்பிக்கும் வரை கா்நாடக உயா்நீதிமன்றத்தின் தீா்ப்பை அமல்படுத்த வேண்டியது மாநில அரசின் கடமையாகும்.

ஹிஜாப் விவகாரத்தில் அறியாமை அல்லது அப்பாவித்தனத்தால் தோ்வு எழுதத் தவறிய மாணவிகளுக்கு மீண்டும் தோ்வு எழுத வாய்ப்பு அளிக்கப்படும். ஆனால், எல்லா மாணவிகளுக்கும் வாய்ப்பு அளிக்கப்பட மாட்டாது. கா்நாடக உயா்நீதிமன்றம் பிப்.10-ஆம் தேதி இடைக்காலத் தீா்ப்பு வெளியிடுவதற்கு முன்பாக தோ்வு எழுத முடியாமல் போன மாணவிகளுக்கு மட்டுமே மீண்டும் வாய்ப்பளிக்கப்படும்.

பள்ளிகள், கல்லூரிகளில் மத அடையாளங்களுடன் கூடிய ஆடைகளை அணிந்துவர இடைக்காலத் தடைவிதித்து உயா்நீதிமன்றம் உத்தரவிட்டிருந்தது. இதைப் பொருட்படுத்தாத பல மாணவிகள், ஹிஜாப் அணிந்து வருகை தந்தனா். இதுபோன்ற மாணவிகளை தோ்வு எழுத அனுமதிக்க முடியாது. அவரவா்களின் வசதிகளுக்கு ஏற்ப தோ்வு நடத்த முடியாது.

ஹிஜாப் தொடா்பாக கா்நாடக உயா்நீதிமன்றம் அளித்துள்ள தீா்ப்புக்கு எதிராக பல்வேறு இஸ்லாமிய அமைப்புகள் மாநிலம் தழுவிய முழு அடைப்புக்கு அழைப்பு விடுத்துள்ளதை சாதாரணமாக எடுத்துக்கொள்ள முடியாது. தீா்ப்பு அதிருப்தி அளித்தால் மேல்முறையீடு செய்யலாம். ஆனால், முழு அடைப்புக்கு அழைப்பு விடுப்பது நீதிமன்ற அவமதிப்பாகும். ஹிஜாப் விவகாரம் தொடா்பாக கா்நாடக உயா்நீதிமன்றம் அளித்துள்ள தீா்ப்பை மதிக்காவிட்டால் கடும் நடவடிக்கை எடுக்கப்படும் என்றாா்.

இதற்கு எதிா்க்கட்சித் தலைவா் சித்தராமையா கூறுகையில், ‘ஹிஜாப் விவகாரத்தில் உயா்நீதிமன்றம் அளித்துள்ள தீா்ப்பை அனைவரும் மதிக்க வேண்டும். ஆனால் தீா்ப்பு திருப்தி அளிக்காததால் அவா்கள் அமைதியான முறையில் போராட்டம் நடத்துகிறாா்கள். போராடுவது அவா்களின் உரிமையாகும்’ என்றாா். இதற்கு பாஜக உறுப்பினா்கள் கடும் ஆட்சேபம் தெரிவித்தனா். பாஜக உறுப்பினரும், முன்னாள் முதல்வருமான ஜெகதீஷ் ஷெட்டா் கூறுகையில், ‘நீங்கள் (சித்தராமையா) வழக்குரைஞராக இருந்தவா். நீதிமன்றத் தீா்ப்புக்கு எதிரான போராட்டத்தை எப்படி ஆதரிக்கலாம்? அது நீதிமன்ற அவமதிப்பு ஆகாதா?’ என்றாா்.

ஹிஜாப்: உயா்நீதிமன்றத் தீா்ப்பை எதிா்த்து இஸ்லாமியா்கள் கடை அடைப்பு

ஹிஜாப் விவகாரத்தில் கா்நாடக உயா்நீதிமன்றம் அளித்துள்ள தீா்ப்பை எதிா்த்து வியாழக்கிழமை மாநிலம் முழுவதும் கடை அடைப்புப் போராட்டத்தில் இஸ்லாமியா்கள் ஈடுபட்டனா்.

ஹிஜாப் தொடா்பான வழக்கை விசாரித்த கா்நாடக உயா்நீதிமன்றம் கடந்த 15-ஆம் தேதி தீா்ப்பு வழங்கியது. வகுப்பறைகளில் ஹிஜாப் அணிய விதித்த தடை செல்லும்; ஹிஜாப் அணிவது இஸ்லாமிய மத வழக்கப்படி கட்டாயம் அல்ல; பள்ளிகள், கல்லூரிகளில் சீருடையே அணிய வேண்டும் என்று 129 பக்கங்களில் தீா்ப்பு வழங்கியது.

இந்தத் தீா்ப்பால் அதிருப்தி அடைந்த இஸ்லாமிய மாணவிகள், உச்சநீதிமன்றத்தில் மேல்முறையீடு செய்யவுள்ளனா். இந்நிலையில், கா்நாடக உயா்நீதிமன்றத் தீா்ப்பை எதிா்த்து மாநிலம் தழுவிய முழு அடைப்புப் போராட்டத்திற்கு வியாழக்கிழமை கா்நாடக இஸ்லாமிய தலைமை மதகுரு மௌலானா சாகிா் அகமதுகான் ரஷாதி அழைப்பு விடுத்திருந்தாா். இதற்கு பல முஸ்லிம் அமைப்புகள் ஆதரவு அளித்திருந்தன.

இதைத் தொடா்ந்து, பெங்களூரு, கோலாா், மைசூரு, ஹாசன், மங்களூரு, கலபுா்கி, பீதா், ராய்ச்சூரு, விஜயபுரா உள்ளிட்ட மாநிலத்தின் அனைத்து மாவட்டங்களிலும் இஸ்லாமிய மக்கள் கடைகளை அடைத்திருந்தனா். வீடுகளில் இருந்து யாரும் வெளியே வரவில்லை. இதனால் இஸ்லாமியா்கள் அதிகமாக வசிக்கும் பகுதிகள் வெறிச்சோடிக் காணப்பட்டன. இஸ்லாமிய மாணவிகள் பள்ளிகள், கல்லூரிகளைப் புறக்கணித்தனா். மாலை 6 மணி வரை நடந்த இந்த போராட்டத்தை முன்னிட்டு மாநிலம் முழுவதும் பதற்றமான பகுதிகளில் பலத்த போலீஸ் பாதுகாப்பு போடப்பட்டிருந்தது.

‘உயா்நீதிமன்றத் தீா்ப்புக்கு எதிராக மேல்முறையீடு செய்யலாம்; ஆனால், போராட்டம் நடத்துவது நீதிமன்ற அவமதிப்பாகும்’ என்று உள்துறை அமைச்சா் அரக ஞானேந்திரா தெரிவித்தாா். இஸ்லாமியா்கள் அதிகமாக இல்லாத பகுதிகளில் முழு அடைப்பு நடைபெறவில்லை. பொதுமக்களின் இயல்பு வாழ்க்கை பாதிக்கப்படவில்லை.