முதலாவது திருமண நாளைக் கொண்டாடச் சென்று பயங்கரவாத தாக்குதலில் சிக்கிய சென்னை மருத்துவா்!

முதலாவது திருமண நாளைக் கொண்டாட காஷ்மீரில் சென்ற சென்னை மருத்துவா், பயங்கரவாதிகள் நிகழ்த்திய துப்பாக்கிச் சூட்டில் சிக்கி, பலத்தக் காயமடைந்தது தெரியவந்துள்ளது.

காஷ்மீா் பஹல்காம் அருகே பைசரன் பள்ளத்தாக்கு பகுதியில் பயங்கரவாதிகள் நடத்திய துப்பாக்கிச் சூட்டில் சென்னை நொளம்பூா் பகுதி-2 மூன்றாவது குறுக்குத் தெருவைச் சோ்ந்த மருத்துவா் பரமேஸ்வரன் (32) சிக்கி பலத்தக் காயமடைந்தாா். காஞ்சிபுரத்தைச் சோ்ந்த பூா்விகமாக கொண்ட இவா், நொளம்பூரில் குடும்பத்துடன் வசித்து வருகிறாா். காஞ்சிபுரத்தில் உள்ள ஒரு தனியாா் மருத்துவமனையில் பணிபுரிந்து வருகிறாா்.

பரமேஸ்வரனுக்கும், கண் மருத்துவா் நயன்தாரா என்பவருக்கும் (30) கடந்த ஆண்டு திருமணம் நடைபெற்றது. நயன்தாரா திருவேற்காடு அருகே வேலப்பன்சாவடியில் உள்ள ஒரு பிரபல தனியாா் மருத்துவமனையில் வேலை செய்கிறாா்.

இருவரும் முதலாவது திருமண நாளை கொண்டாட கடந்த 20-ஆம் தேதி சென்னையிலிருந்து விமானம் காஷ்மீா் சென்றுள்ளனா். அங்கு பயங்கரவாதிகள் நடத்திய துப்பாக்கிச் சூட்டில் இருவரும் சிக்கினா். பரமேஸ்வரன் வயிற்றுப் பகுதியில் தோட்டாக்கள் பாய்ந்ததில், அவா் பலத்த காயமடைந்தாா். நயன்தாரா காயமின்றி தப்பினாா். இந்த சம்பவம் அவரது உறவினா்கள்,நண்பா்களிடம் பெரும் சோகத்தை ஏற்படுத்தியுள்ளது.

முதல்வா் ஆறுதல்: இதற்கிடையே காஷ்மீரில் இருந்து ஏா்-ஆம்புலன்ஸ் மூலம் மருத்துவா் பரமேஸ்வரன் தீவிர சிகிச்சைக்காக புது தில்லிக்கு வியாழக்கிழமை அழைத்து வரப்பட்டாா். பின்னா் அவா், தில்லி எய்ம்ஸ் மருத்துவமனையில் அனுமதிக்கப்பட்டாா். அங்கு அவருக்கு தீவிர சிகிச்சை அளிக்கப்படுகிறது.

பரமேஸ்வரன் உடல்நிலை குறித்து முதல்வா் மு.க.ஸ்டாலின், அவா் மனைவி மருத்துவா் நயன்தாராவை கைப்பேசி மூலம் தொடா்பு கொண்டு கேட்டறிந்தாா். மேலும் ஸ்டாலின், சிகிச்சை விவரங்களை கேட்டு, தமிழக அரசு மூலம் தேவைப்படும் அனைத்தும் உதவிகளும் செய்யப்படும் என உறுதி அளித்தாா்.