இருசக்கர வாகனத்தின் ஆக்சிலேட்டரை முறுக்கியதால் விபத்து: சிறுமி உயிரிழப்பு

சென்னை: சென்னை சைதாப்பேட்டையில் நின்று கொண்டிருந்த இருசக்கர வாகனத்தின் ஆக்சிலேட்டரை முறுக்கியதால் கீழே விழுந்து 4 வயது சிறுமி உயிரிழந்தாா்.

அம்பத்தூா் துரைசாமி ரெட்டி தெருவைச் சோ்ந்த தினேஷ் (35), தனியாா் நிறுவனத்தில் பணியாற்றி வருகிறாா். இவரது 4 வயது மகள் நிஹாரிகா, மேற்கு மாம்பலம் புஷ்பாவதி அம்மாள் தெருவில் வசிக்கும் தாத்தா பத்மநாபன் வீட்டில் இருந்து வந்தாா். பத்மநாபன் தனது பேத்தியை சைதாப்பேட்டை சாஸ்திரி நகா் பிரதான சாலையில் உள்ள ஒரு கடைக்கு பொருள்கள் வாங்க ஞாயிற்றுக்கிழமை தனது இருசக்கர வாகனத்தில் அழைத்துச் சென்றாா். கடைக்கு வந்ததும், பத்பநாபன் இருசக்கர வாகனத்தை ஆஃப் செய்யாமல் நிஹாரிகாவை முன்பக்கத்தில் நிற்க வைத்துவிட்டுச் சென்றாா். அப்போது, நிஹாரிகா திடீரென இருசக்கர வாகனத்தின் ஆக்சிலேட்டரை வேகமாக முறுக்கினாா். இதனால் தறிக்கெட்டு ஓடிய இருசக்கர வாகனம் அருகில் உள்ள கடையில் மோதி நிஹாரிகா மேல் விழுந்தது. இதில் நிஹாரிகா தலை, நெஞ்சுப் பகுதியில் பலத்த காயம் ஏற்பட்ட நிலையில், அங்கிருந்தவா்கள் சிறுமியை மீட்டு அருகே உள்ள தனியாா் மருத்துவமனைக்கு சோ்த்தனா்.

அங்கு சிறுமியை பரிசோதித்த மருத்துவா்கள், அவா் ஏற்கெனவே இறந்துவிட்டதாகத் தெரிவித்தனா். இதைக்கேட்டு தாத்தா பத்மநாபன் உள்ளிட்ட அவரது குடும்பத்தினா் பெரும் அதிா்ச்சியடைந்தனா்.

இது குறித்து கிண்டி போக்குவரத்து புலனாய்வுப் பிரிவு போலீஸாா் வழக்குப் பதிந்து விசாரணை நடத்தி வருகின்றனா்.