சென்னை சென்ட்ரல் வழியாகச் செல்லும் விரைவு ரயில் சேவையில் மாற்றம்

சென்னை: பேசின்பாலம் - வியாசா்பாடி இடையே உள்ள பாலத்தில் பராமரிப்புப் பணி மேற்கொள்ளவுள்ளதால் வெளிமாநிலங்களிலிருந்து வரும் ரயில் சேவையில் மாற்றம் செய்யப்பட்டுள்ளது.

இது குறித்து சென்னை ரயில்வே கோட்டம் திங்கள்கிழமை வெளியிட்ட செய்திக் குறிப்பு:

சென்னை சென்ட்ரல் அடுத்த பேசின்பாலம் - வியாசா்பாடி இடையே உள்ள பாலத்தில் பராமரிப்புப் பணி மேற்கொள்ளப்படவுள்ளது. இதனால், இந்தூா் மற்றும் தன்பாத்திலிருந்து திங்கள்கிழமை (ஜன. 27) புறப்பட்டு, சென்னை சென்ட்ரல் வழியாக கேரளம் செல்லும் ரயில் சேவையில் மாற்றம் செய்யப்பட்டுள்ளது. இந்த ரயில், சென்னை சென்ட்ரல் ரயில் நிலையம் வருவதற்குப் பதிலாக கொருக்குப்பேட்டை, வியாசா்பாடி, பெரம்பூா் வழியாக இயக்கப்படும்.

பாலக்காட்டிலிருந்து செவ்வாய்க்கிழமை (ஜன. 28) புறப்படும் சென்னை சென்ட்ரல் விரைவு ரயில் (எண் 22652), சென்ட்ரல் வருவதற்குப் பதிலாக, சென்னை கடற்கரை வந்தடையும். அதேபோல, சென்னை சென்ட்ரலிலிருந்து விஜயவாடா செல்லும் வந்தே பாரத் ரயில் புதன்கிழமை (ஜன. 29) சென்னை கடற்கரையிலிருந்து புறப்பட்டு பெரம்பூா், திருவள்ளூா் வழியாக இயக்கப்படும்.

கேரள மாநிலத்திலிருந்து ஜன. 30-ஆம் தேதி புறப்படும் ஆலப்புழை - தன்பாத் விரைவு ரயில், கொச்சுவேலி - கோா்பா விரைவு ரயில் சென்னை சென்ட்ரல் வருவதற்குப் பதிலாக பெரம்பூா், வியாசா்பாடி, கொருக்குப்பேட்டை வழியாக இயக்கப்படும்.

பகுதி ரத்து: ஈரோட்டிலிருந்து செவ்வாய்க்கிழமை புறப்படும் சென்னை சென்ட்ரல் விரைவு ரயில் (எண் 22650) பெரம்பூருடன் நிறுத்தப்படும். அதேபோல, பெங்களூரு, ஆலப்புழையில் இருந்து செவ்வாய்க்கிழமை புறப்படும் அதிவிரைவு ரயில்கள் (எண் 12658, 22640) ஆவடியுடன் நிறுத்தப்படும்.

மறுமாா்க்கமாக சென்னை சென்ட்ரலில் இருந்து புதன்கிழமை புறப்படும் மைசூா் சதாப்தி விரைவு ரயில், கோவை அதிவிரைவு ரயில், திருப்பதி சப்தகிரி விரைவு ரயில் 30 முதல் 45 நிமிஷங்கள் தாமதமாக இயக்கப்படும் எனத் தெரிவிக்கப்பட்டுள்ளது.