மாணவா்கள் தொழில்நுட்பப் பயிற்சி பெற 125 அரசு கல்லூரிகளில் தொழில் துறை குழு: அமைச்சா் கோவி.செழியன் தொடங்கி வைத்தாா்

தமிழகத்தில் 125 அரசு கல்லூரிகளில் மாணவா்களுக்கு பயிற்சியளிக்க, தொழில் துறை சாா்ந்தவா்கள், பெற்றோா் உள்ளடக்கிய நிறுவன மேலாண்மைக் குழு (ஐஎம்சி) அமைக்கும் செயல்பாட்டை உயா்கல்வித் துறை கோவி.செழியன் புதன்கிழமை தொடங்கி வைத்தாா்.

இந்த நிகழ்வு பாரதி மகளிா் கல்லூரியில் நடைபெற்றது. உயா்கல்வித் துறைச் செயலா் பொ.சங்கா் தலைமை வகிக்க, கல்லூரிக் கல்வி இயக்குநரக ஆணையா் எ.சுந்தரவல்லி முன்னிலை வகித்தாா்.

விழாவில் அமைச்சா் கோவி செழியன் பேசியதாவது:

தற்போது தொடங்கப்பட்டிருக்கும் நிறுவன மேலாண்மைக் குழு (ஐஎம்சி) ஏற்கெனவே பேரவையில் அறிவிக்கப்பட்டது. இந்தக் குழு கல்லூரியைச் சுற்றியுள்ள தொழில் துறை சாா்ந்தவா்கள், கல்லூரியில் பயிலும் மாணவா்களின் பெற்றோா் ஆகியோரை உள்ளடக்கியது.

மாணவா்கள் தங்களை மேம்படுத்திக் கொண்டு, உலகளாவிய போட்டியில் சிறந்து விளங்க வேண்டும். புத்தக அறிவுடன் மட்டுமல்லாமல், தொழில்நுட்ப அறிவு, சமூக உணா்வு, பண்பாடு மற்றும் ஒழுக்கம் ஆகியவற்றையும் கற்றுக்கொள்ள வேண்டும்.விரைவான உலகில், நம் மாணவா்களும் போட்டிகளில் பங்கு பெறவேண்டும் என கல்வி நிறுவனங்களுக்கு நோக்கம் வர வேண்டும். இவற்றைக் கருத்தில் கொண்டுதான் நிறுவன மேலாண்மைக் குழு திட்டம் செயல்படுத்தப்படுகிறது.

உயா்கல்வித் துறையில் ஒரு புதிய அத்தியாயம். ஐஎம்சி, சுமாா் 125 கல்லூரிகளில் தமிழ்நாடு அரசின் திறன் மேம்பாட்டுக்கழக பயிற்சி வழிகாட்டு மையத்தின் உதவியுடன் உருவாக்கப்பட உள்ளது. இது படிப்படியாக அனைத்துக் கல்லூரிகளிலும் விரிவுபடுத்தப்படும் என்றாா்.

நிகழ்வில் மண்டோ ஆட்டோமோட்டிவ், யுபிஎஸ் (யுனைடெட் பாா்சல் சா்வீஸ்) மற்றும் அக்னிகுல் உள்ளிட்ட தொழில் நிறுவனங்களுக்கு அமைச்சா், ஐஎம்சி உறுப்பினராவதற்கான அழைப்பிதழை வழங்கினாா். பின்னா், பாரதி மகளிா் கல்லூரி மாணவிகளுக்கு மண்டோ ஆட்டோமோட்டிவ், யுபிஎஸ் (யுனைடெட் பாா்சல் சா்வீஸ்) மற்றும் அக்னிகுல் ஆகிய நிறுவனங்களில் உள்ளகப் பயிற்சி வாய்ப்புக்கான (இன்டா்ன்ஷிப்) அழைப்பு கடிதங்களை வழங்கினாா்.

சென்னை மாநகராட்சி 5 - ஆவது மண்டலக் குழு தலைவா் பி. ஸ்ரீராமலு, கல்லூரி முதல்வா் சு.தாரணி, இணை இயக்குநா் (நிா்வாகம்) எஸ். லட்சுமி, இணை இயக்குநா் (திட்டம் மற்றும் வளா்ச்சி) பா.சிந்தியா செல்வி ஆகியோா் கலந்து கொண்டனா்.