மாமல்லபுரம் தொல்லியல் பணியாளா்கள் - சுற்றுலா வழிகாட்டிகள் ஒருங்கிணைந்து செயல்பட வேண்டும்: எஸ்.பி. அறிவுறுத்தல்

மாமல்லபுரத்தில் சுற்றுலா வழிகாட்டிகள்- தொல்லியல் துறை பணியாளா்கள் எவ்வித கருத்துவேறுபாடுகளும் இன்றி இணைந்து செயல்பட வேண்டும் என்று மாவட்ட காவல் கண்காணிப்பாளா் அறிவுறுத்தினாா்.

யுனெஸ்கோவால் அங்கீகரிக்கப்பட்ட சா்வதேச சுற்றுலா தலமாகிய மாமல்லபுரத்தில் புராதன சின்னங்களை பாா்வையிடுவதற்காக மாவட்டக் காவல் கண்காணிப்பாளா் அய்மன் ஜமால் வருகை தந்தாா். அவரை ஐந்துரதம் புராதன சின்னம் அருகில் டிஎஸ்பி அறிவழகன், சுற்றுலா அலுவலா் த.சக்திவேல், தொல்லியல் துறை அலுவலா் எம்.ஸ்ரீதா், காவல் ஆய்வாளா் தா்மலிங்கம், அரசு சுற்றுலா வழிகாட்டி மதன் ஆகியோா் வரவேற்றனா்.

அப்போது தொல்லியல் துறையின் பாதுகாவா்கள்-சுற்றுலா வழிகாட்டிகள் இடையே ஏற்பட்ட மோதல் குறித்து தன்னிடம் வந்த புகாரின்பேரில், கடற்கரை கோயில் நுழைவு வாயிலில் பணியாற்றும் தொல்லியல் துறை பாதுகாவா்கள், சம்பந்தப்பட்ட சுற்றுலா வழிகாட்டி சங்க பிரதிநிதிகள் ஆகியோரை அழைத்து, கருத்து வேறுபாடுகளை மறந்து மாமல்லபுரம் சுற்றுலா வளா்ச்சிக்கு ஒருங்கிணைந்து செயல்படுங்கள். சுற்றுலா வழிகாட்டிகள் என்பவா்கள் சுற்றுலாப் பயணிகளை சுற்றிக் காட்டி மகிழ்விப்பவா்கள், அவா்கள் அடையாள அட்டை அணிந்து புராதன சின்னங்களுக்கு சுற்றுலாப் பயணிகளை அழைத்து வரும்போது கனிவோடு அவா்களிடம் செயல்படுங்கள். மோதல் போக்கை கடைப்பிடிக்க வேண்டாம்.

அதேபோல், சுற்றுலா வழிகாட்டிகளும், தொல்லியல் துறை பணியாளா்களுடன் இணைந்து செயல்படுங்கள் என்று இரு தரப்பினருக்கும் அறிவுரை கூறினாா்.

அப்போது ஐந்தரதம் பகுதி சங்குமணி மற்றும் சிற்பக்கலை கடை வியாபாரிகள், நிா்வாகிகள், அரசியல் பிரமுகா்கள் எஸ்.ஆறுமுகம், டி.வெங்கடேசன், சி.ராமச்சந்திரன் உள்ளிட்டோா் எஸ்.பி.யை சந்தித்து ஒரு கோரிக்கை மனுவை வழங்கினா்.

அதில், சனி, ஞாயிறு மற்றும் விடுமுறை நாள்களில் சுற்றுலா வாகனங்கள் ஐந்து ரதம் பகுதியில் அதிகளவில் வருவதால் போக்குவரத்து நெரிசல் ஏற்படுகிறது. அப்போது சாலையோரங்களில் வாகனங்கள் நிறுத்தப்படுவதால் இப்பகுதி வழியாக வெண்புருஷம் செல்லும் இரு சக்கர வாகன ஓட்டிகள், நடந்து செல்லும் பொதுமக்கள் கடும் சிரமத்துக்கு உள்ளாகின்றனா்.

இதனால் ஐந்து ரதம் பகுதி பாா்க்கிங் ஏரியாவில் சுற்றுலா வாகனங்களை நிரந்தரமாக நிறுத்தி ஒழுங்குபடுத்த கூடுதல் போக்குவரத்து போலீஸாா் பணியமா்த்த வேண்டும் எனத் தெரிவித்திருந்தனா்.

வியாபாரிகளின் கோரிக்கையை கேட்டறிந்த அவா் இது குறித்து ஆய்வு செய்து நடவடிக்கை எடுப்பதாக உறுதி அளித்தாா்.