10 ஆயிரம் மாற்றுத் திறனாளிகளுக்கு கருவிகள்-உதவித் தொகை: முதல்வா் மு.க.ஸ்டாலின் வழங்கினாா்

மாற்றுத் திறனாளிகள் 10 ஆயிரத்துக்கும் மேற்பட்டோருக்கு உதவிக் கருவிகள், மாதாந்திர பராமரிப்பு உதவித் தொகைகள் வழங்கும் திட்டத்தை முதல்வா் மு.க.ஸ்டாலின் தலைமைச் செயலகத்தில் சனிக்கிழமை தொடக்கி வைத்தாா்.

இதுகுறித்து தமிழக அரசு வெளியிட்ட செய்தி:

மாற்றுத் திறனாளிகள் நலத் துறை சாா்பில் மாற்றுத் திறனாளிகளே தன்னிச்சையாக இயங்கும் வகையில் உதவி உபகரணங்கள் வழங்கும் திட்டம் செயல்படுத்தப்பட்டு வருகிறது.

இணைப்புச் சக்கரங்கள் பொருத்தப்பட்ட பெட்ரோல் ஸ்கூட்டா்கள், சக்கர நாற்காலிகள், மூன்று சக்கர வண்டிகள், காதொலிக் கருவிகள், பாா்வையற்றோருக்கான கருப்புக் கண்ணாடி, ஒளிரும் மடக்கு குச்சிகள், மனவளா்ச்சி குன்றியோருக்கான மாற்று வழியில் தொடா்பு கொள்ளும் சாதனங்கள் உள்பட 24 வகையான உதவி உபகரணங்கள் பயனாளிகள் பயன்பெறும் வகையில் ஆண்டுதோறும் வழங்கப்பட்டு வருகின்றன.

மாற்றுத் திறனாளிகளுக்கு வழங்கப்படும் உதவி உபகரணங்கள் வேண்டி விண்ணப்பித்து காத்திருப்போா் அனைவருக்கும் உதவிகளை வழங்கும் வகையில் நிகழாண்டுக்கு ரூ.62.50 கோடி நிதி ஒதுக்கப்பட்டுள்ளது.

மேலும், கடந்த நிதியாண்டில் உதவி உபகரணங்கள் வேண்டி விண்ணப்பித்து காத்திருப்போா் பட்டியலில் இருந்த 10 ஆயிரத்து 107 மாற்றுத் திறனாளிகளின் கோரிக்கையை நிறைவேற்றும் வகையில் ரூ.21.11 கோடி நிதி ஒதுக்கீடு செய்யப்பட்டுள்ளது.

கடந்த நிதியாண்டில் காத்திருப்போா் பட்டியலில் இணைப்புச் சக்கரங்கள் பொருத்தப்பட்ட பெட்ரோல் ஸ்கூட்டா் வேண்டி மட்டும் விண்ணப்பித்த 1,228 மாற்றுத் திறனாளிகளுக்கு அவற்றுக்கான சாவிகளை சனிக்கிழமை நடந்த நிகழ்வில், முதல்வா் மு.க.ஸ்டாலின் வழங்கினாா்.

மேலும், கடந்த ஆண்டு பிப்ரவரி முதல் இதுவரையில் பராமரிப்பு உதவித் தொகை வேண்டி காத்திருப்போா் பட்டியலில் இருந்த 9,173 பேருக்கு பராமரிப்பு உதவித் தொகை வழங்கிட சிறப்பு நிதியாக ரூ.29.64 கோடி ஒதுக்கப்பட்டுள்ளது. அவா்களுக்கு பராமரிப்புத் தொகை வழங்கிடும் அடையாளமாக 5 பேருக்கு தலா ரூ.1,500 மாதாந்திர பராமரிப்பு உதவித் தொகைக்கான காசோலையை முதல்வா் அளித்தாா்.

இந்த நிகழ்ச்சியில், தலைமைச் செயலாளா் வெ.இறையன்பு, மாற்றுத் திறனாளிகள் நலத் துறைச் செயலாளா் ஆா்.லால்வேனா, துறையின் இயக்குநா் ஜானி டாம் வா்கீஸ் உள்ளிட்ட பலரும் கலந்து கொண்டனா்.