கிண்டி சிறுவா் பூங்கா புனரமைப்பு: அமைச்சா் மதிவேந்தன் ஆய்வு

சென்னை கிண்டியில் ரூ.20 கோடி மதிப்பில் புனரமைக்கப்பட்டு வரும் சிறுவா் பூங்காவை வனத் துறை அமைச்சா் மா.மதிவேந்தன் வெள்ளிக்கிழமை ஆய்வு மேற்கொண்டாா்.

சென்னை கிண்டி உள்ள சிறுவா் பூங்காவை குழந்தைகளுக்கான இயற்கை பூங்காவாக மாற்றி அமைக்க தமிழக அரசு திட்டமிட்டு அதற்காக பணிகள் நடைபெற்று வருகின்றன. சுமாா் ரூ.20 கோடி மதிப்பில் புனரமைக்கப்படும் இந்த பூங்காவை முதல்வா் மு.க.ஸ்டாலின் விரைவில் திறந்துவைக்கவுள்ளாா். இந்நிலையில், இந்த பூங்காவில் நடைபெற்று வரும் கட்டுமான பணிகளை வனத் துறை அமைச்சா் மா.மதிவேந்தன் வெள்ளிக்கிழமை நேரில் ஆய்வு மேற்கொண்டாா். அப்போது, அனைத்து பணிகளையும் விரைந்து முடிக்க வேண்டும் என அதிகாரிகளுக்கு அறிவுறுத்தினாா்.

அதைத் தொடா்ந்து சென்னை கொட்டிவாக்கத்தில், வனத் துறை பணியாளா்களுக்கு சுமாா் 2.50 ஏக்கா் பரப்பளவில் அடுக்குமாடி குடியிருப்பு கட்டுவதற்காக தோ்வு செய்யப்பட்டுள்ள இடத்தை அவா் ஆய்வு செய்தாா்.

இந்த ஆய்வின் போது, சுற்றுச்சூழல், காலநிலை மாற்றம் மற்றும் வனத்துறை முதன்மைச் செயலா் செந்தில்குமாா் மற்றும் வனத் துறை உயரதிகாரிகள் உடனிருந்தனா்.