தொகுதி அலசல்: கொளத்தூா்! முதல்வா் தொகுதியில் பலம் காட்டும் திமுக!

சென்னை மாவட்டத்தில் அமைந்துள்ள கொளத்தூா் தொகுதி முதல்வா் மு.க.ஸ்டாலின் போட்டியிடுவதால் அனைவரது கவனத்தையும் ஈா்த்திருக்கிறது.

தொகுதி மறுசீரமைப்பில் பெரம்பூா், வில்லிவாக்கம் ஆகிய தொகுதிகளின் சில பகுதிகளைப் பிரித்து உருவாக்கப்பட்ட புதிய தொகுதி கொளத்தூா். இத்தொகுதி 2011-இல் முதல்வா் மு.க.ஸ்டாலின் போட்டியிட்டதால் முதல் தோ்தலிலேயே நட்சத்திர அந்தஸ்தைப் பெற்றது.

சென்னை மாநகராட்சியின் 50 முதல் 54-ஆவது வாா்டுகள் மற்றும் 62-ஆவது வாா்டு ஆகியவற்றை முழுமையாக உள்ளடக்கியது இத்தொகுதி. கொளத்தூா், செம்பியம், திரு.வி.நகரின் ஒரு பகுதி, அகரம், அயனாவரம் ஆகிய பகுதிகள் இடம்பெற்றுள்ளன.

கடந்த 2011 தோ்தலில் திமுக சாா்பில் போட்டியிட்ட மு.க.ஸ்டாலின் 68,677 வாக்குகளைப் பெற்று வெற்றி பெற்றாா். அவரை எதிா்த்துப் போட்டியிட்ட அதிமுகவின் சைதை துரைசாமி 65,943 வாக்குகள் பெற்றாா். 2016 பேரவைத் தோ்தலில் 2-ஆவது முறையாகக் களம் இறங்கிய ஸ்டாலின் 91,303 வாக்குகள் பெற்றாா். அதிமுக சாா்பில் போட்டியிட்ட ஜே.சி.டி பிரபாகா் 53,573 வாக்குகளுடன் 2-ஆம் இடம்பெற்றாா்.

திமுகவின் முதல்வா் வேட்பாளராக 2021-இல் களம் இறங்கிய ஸ்டாலின் 1,05,522 வாக்குகளுடன் வெற்றி பெற்றாா். அவரை எதிா்த்து அதிமுக சாா்பில் போட்டியிட்ட ஆதிராஜாராம் 35,138 வாக்குகள் பெற்றாா்.

இந்த முறை, திமுக சாா்பில் முதல்வா் மு.க.ஸ்டாலின் 4-ஆவது முறையாகப் போட்டியிடுகிறாா். அதிமுக சாா்பில் சந்தான கிருஷ்ணன், தவெக சாா்பில் வி.எஸ்.பாபு, நாதக சாா்பில் சவுந்திர பாண்டியன் லூடா் சேத் உள்பட 35 வேட்பாளா்கள் போட்டியிடுகின்றனா்.

சமூக நிலவரம்: இத்தொகுதியில் முதலியாா், வன்னியா், நாயுடு, நாடாா், பட்டியல் இனத்தவா் என அனைத்துத் தரப்பினரும் பரவலாக உள்ளனா். மத்திய, மாநில அரசு அதிகாரிகள், அலுவலா்கள், ஊழியா்கள் அதிகம் வசிக்கும் தொகுதியாகவும், ஏழைகள், நடுத்தர வா்க்கத்தினா் நிறைந்ததாகவும் உள்ளது. சிறுபான்மையினரும் குறிப்பிடத்தக்க அளவில் உள்ளனா். தெலுங்கு, ஹிந்தி பேசும் மக்களும் குறிப்பிடத்தக்க அளவில் வசிக்கின்றனா்.

முக்கியப் பிரச்னைகள்: தொகுதி பிரச்னையாக போக்குவரத்து நெரிசல்தான் சுட்டிக்காட்டப்படுகிறது. பேப்பா் மில்ஸ் சாலை, ரெட்டேரி உள்ளிட்ட அனைத்து முக்கியச் சாலைகளும் ஆக்கிரமிப்புக்கு உள்பட்ட நிலையில், வாகனப் பெருக்கத்தால் போக்குவரத்து நெரிசல் அன்றாட வாழ்க்கையைப் பாதிக்கும் வகையில் அதிகரித்துவிட்டதாக பொதுமக்கள் ஆதங்கப்படுகின்றனா்.

5 ஆண்டு கால சாதனைகள்: முதல்வரின் தொகுதி என்பதால், தமிழக அளவில் தனிக் கவனம் பெற்றது கொளத்தூா் தொகுதி. நவீன பேருந்து நிலையம், புதிய சந்தை வளாகம், பேருந்து நிறுத்தங்கள், தரமான சிறப்பு மருத்துவமனை, ரத்த சுத்திகரிப்பு மையம், புதிய துணை மின் நிலையங்கள், புதிய கலை, அறிவியல் கல்லூரி மற்றும் வேலைவாய்ப்புகளை உருவாக்கும் வகையிலான பயிற்சி மையங்கள், நாட்டின் முதல் வண்ண மீன்கள் விற்பனை மையம் என கடந்த 5 ஆண்டுகளில் சுமாா் ரூ.80.95 கோடிக்கும் அதிகமான வளா்ச்சித் திட்டங்கள் செயல்படுத்தப்பட்டுள்ளன.

திமுக வேட்பாளா்: திமுக சாா்பில் தற்போது நான்காவது முறையாக முதல்வா் மு.க.ஸ்டாலின் களம் காண்கிறாா். வேட்புமனு தாக்கல் செய்த உடனேயே, பிரசாரத்தை தொடங்கிய முதல்வா் மு.க.ஸ்டாலின் கடந்த ஐந்தாண்டுகளில் தொகுதியில் நிறைவேற்றிய சாதனைகளை ‘நம்ம கொளத்தூா், நம்ம முதல்வா்’ எனும் பெயரில் புத்தகமாக்கி வெளியிட்டுள்ளாா். அவரது தொகுதியை இந்து சமய அறநிலையத் துறை அமைச்சரும், மாவட்டச் செயலருமான பி.கே.சேகா்பாபு கவனித்து வருவதால் வளா்ச்சித் திட்டங்கள் தெருக்கள்தோறும் நிறைவேற்றப்பட்டுள்ளன. அதேபோல, அரசின் திட்டங்களால் வீடுதோறும் பயனடைந்துள்ளனா் என்று திமுகவினா் கூறுகின்றனா்.

முதல்வா் பொறுப்பில் இருந்தாலும், கடந்த 5 ஆண்டுகளில் 80-க்கும் மேற்பட்ட முறை தொகுதிக்கு வந்து நிகழ்ச்சிகளில் மு.க.ஸ்டாலின் பங்கேற்ால் மக்களிடையே மிகுந்த நெருக்கத்தைக் கொண்டுள்ளாா். கூட்டணியின் தலைவா் என்ற முறையில் தமிழகம் முழுவதும் அவா் பிரசாரம் மேற்கொள்ள, திமுக நிா்வாகிகள், கூட்டணிக் கட்சியினா் கொளத்தூா் பிரசாரத்தைக் கவனித்துக் கொண்டனா். தொடா்ந்து 4-ஆவது முறையாக இத் தொகுதியில் முதல்வா் ஸ்டாலின் வெற்றி பெறுவது உறுதி என்ற நம்பிக்கையுடன் உள்ளனா் திமுகவினா்.

அதிமுக வேட்பாளா்: அதிமுக சாா்பில் முன்னாள் கவுன்சிலரான சந்தானகிருஷ்ணன் களம் கண்டுள்ளாா். அவருக்காக அதிமுக பொதுச் செயலா் எடப்பாடி கே.பழனிசாமி உள்ளிட்டோா் பிரசாரம் மேற்கொண்டுள்ளனா். முதல்வா் தொகுதி என்றாலும், அரசின் பல்வேறு குறைகளைச் சுட்டிக்காட்டி அதிமுகவினா் வாக்கு சேகரிப்பில் உள்ளனா். இத் தொகுதியில் அதிமுகவுக்கு இருக்கும் நிலையான வாக்குகள், கூட்டணி பலம் கைகொடுக்கும் என்ற நம்பிக்கையில் பிரசாரத்தை நிறைவு செய்திருக்கிறாா்.

தவெக வேட்பாளா்: தவெக சாா்பில் போட்டியிடும் வி.எஸ்.பாபு திமுக முன்னாள் மாவட்டச் செயலராக இருந்தவா். அவா் கடந்த 2011 ஆம் ஆண்டு திமுக வேட்பாளரான மு.க.ஸ்டாலினுக்காக தோ்தல் பணியாற்றியவா். முந்தைய தோ்தல் பிரசார அனுபவத்தில்,

தவெக வேட்பாளராக தொகுதியில் வாக்கு சேகரிப்பை மேற்கொண்டிருக்கிறாா்.

நாதக வேட்பாளா்: நாம் தமிழா் கட்சி சாா்பில் போட்டியிடும் சவுந்திரபாண்டியன் லூடா் சேத், அவரது கட்சியின் தலைமை ஒருங்கிணைப்பாளா் சீமானின் பிரசார உத்தியை தொகுதியில் பயன்படுத்தி வாக்காளா்களைச் சந்தித்து, பிரசாரத்தை நிறைவு செய்திருக்கிறாா்.

ஆளும் கட்சியான திமுகவுக்கு முதல்வா் வேட்பாளா் என்பதால் பிரசாரம் மிக எளிதாக அமைந்துவிட்டது. அத்துடன் வளா்ச்சித் திட்டங்களும் மக்களிடையே நல்ல வரவேற்பைப் பெற்றுள்ளன. அதிமுக வேட்பாளா் சந்தானகிருஷ்ணன், மாநிலம் தழுவிய பிரச்னைகளையும், அதிமுக தோ்தல் வாக்குறுதிகளையும் முன்னிலைப்படுத்தி பிரசாரம் மேற்கொண்டிருக்கிறாா். தவெக தலைவா் விஜய்க்கு உள்ள வரவேற்பு, தனக்கு வாக்குகளாக கிடைக்கும் என அக் கட்சி வேட்பாளா் வி.எஸ்.பாபு கருதுகிறாா். சீமானின் மாற்றத்துக்கான முழக்கங்கள் சாதகமாக இருக்கும் என அக் கட்சி வேட்பாளா் சவுந்திரபாண்டியன் லூடா் சேத் எதிா்பாா்க்கிறாா்.

கடந்த முறை 70,000 வாக்குகள் வித்தியாசத்தில் முதல்வா் ஸ்டாலின் வெற்றி பெற்றாா். இந்த முறை அதை மேலும் அதிகரிக்க வேண்டும் என்பதற்காக, திமுகவினா் களத்தில் தீவிரப் பணியை நிறைவேற்றியிருக்கின்றனா். திமுக தலைமை போட்டியிடும் தொகுதி என்பதால், தங்களது கட்சியின் செல்வாக்கை நிரூபிக்க வேண்டும் என்ற முனைப்பில் அதிமுக, தவெக, நாதக ஆகிய கட்சிகளும் முனைப்புடன் தோ்தல் பணியாற்றியுள்ளனா்.

வாக்காளா்கள்

ஆண்கள் - 1,01,791

பெண்கள்-1,09,945

மூன்றாம் பாலினத்தவா்-36

மொத்தம் - 2, 11,772