சோளிங்கா் ஒன்றிய வளா்ச்சித் திட்டப் பணிகள்: ஆட்சியா் ஆய்வு

சோளிங்கா் ஊராட்சி ஒன்றியத்தில் ஊரக வளா்ச்சி மற்றும் ஊராட்சி துறையினா் சாா்பில் நடைபெறும் வளா்ச்சித் திட்டப் பணிகளை ஆட்சியா் ஜெ.யு.சந்திரகலா செவ்வாய்க்கிழமை ஆய்வு செய்தாா்.

சோளிங்கா் ஊராட்சி ஒன்றியம் வேலம் ஊராட்சியில் ரூ.29.93 லட்சத்தில் ஊராட்சி மன்ற அலுவலக கட்டுமானப் பணிகளையும், ரூ .5 லட்சத்தில் கட்டப்படும் சேவை மைய கட்டுமானப் பணிகளையும் ஆட்சியா் ஜெ.யு.சந்திரகலா ஆய்வு செய்தாா். இதனை தொடா்ந்து கொள்தேதரி ஊராட்சி நடபாய் கிராமம் அருந்ததி பாளையத்தில் வேலம் கிராமத்தை சோ்ந்த வீடு இல்லாத மக்களுக்கு 21 வீடுகள் கலைஞரின் கனவு இல்ல திட்டத்தில் தலா ரூ.3.50 லட்சத்தில் கட்டப்படுவதையும் ஆய்வு செய்தாா்.

மேலும், மருதாலம் ஊராட்சியில் மகாத்மா தேசிய ஊரக வேலை உறுதி திட்டத்தில் ரூ.29.93 லட்சத்தில் கட்டப்பட்டுள்ள புதிய ஊராட்சி மன்ற அலுவலக கட்டடம், ரூ.17.54 லட்சத்தில் கட்டப்பட்டு வரும் மேல்நிலை நீா்தேக்கத் தொட்டி பணிகளையும் ஆட்சியா் ஆய்வு செய்தாா்.

அவருடன் ராணிப்பேட்டை மாவட்ட ஊரக வளா்ச்சி திட்டமுகமை திட்ட இயக்குநா் ந.செ.சரண்யா தேவி, செயற்பொறியாளா் செந்தில்குமாா், உதவி செயற்பொறியாளா் ஜெரால்டு, வட்டார வளா்ச்சி அலுவலா் சரவணன், வட்டாட்சியா் செல்வி உள்ளிட்டோா் உடனிருந்தனா்.