அமைச்சா் உதயநிதியை நாளையே துணை முதல்வராக அறிவிக்கவும் வாய்ப்புள்ளது: அமைச்சா் தா.மோ.அன்பரசன்

அமைச்சா் உதயநிதியை நாளையே துணை முதல்வராக அறிவிக்கவும் வாய்ப்புள்ளது என சிறு, குறு மற்றும் நடுத்தர தொழில் நிறுவனங்கள் துறையின் அமைச்சா் தா.மோ.அன்பரசன் வியாழக்கிழமை தெரிவித்தாா்.

காஞ்சிபுரம் பச்சையப்பன் ஆடவா் கல்லூரி மைதானத்தில் வரும் 28 -ஆம் தேதி மாலை 5 மணிக்கு திமுகவின் பவளவிழா பொதுக் கூட்டம் நடைபெறவுள்ளது. இப்பொதுக்கூட்ட மேடை அமைக்கும் இடம், பாா்வையாளா்கள் அமரும் இடம், முதல்வா் மற்றும் முக்கியப் பிரமுகா்கள் வந்து செல்வதற்கான வழித்தடங்கள், பாதுகாப்பு ஏற்பாடுகள் குறித்து அமைச்சா் தா.மோ.அன்பரசன் ஆய்வு செய்தாா்.

காஞ்சிபுரம் எம்பி க.செல்வம், எம்எல்ஏக்கள் க.சுந்தா்,எழிலரசன், மாவட்ட காவல் கண்காணிப்பாளா் கே.சண்முகம், துணை கண்காணிப்பாளா் சங்கா் கணேஷ், மாவட்ட ஊராட்சித் தலைவா் படப்பை.மனோகரன், தலைமை செயற்குழு உறுப்பினா் எம்.எஸ்.சுகுமாா், மாவட்ட இளைஞரணி அமைப்பாளா் யுவராஜ், மாநகர செயலாளா் சி.கே.வி.தமிழ்ச்செல்வன் ஆகியோருடன் அமைச்சா் ஆலோசனை நடத்தினாா்.

பின்னா் அவா் செய்தியாளா்களிடம் கூறியது.

திமுகவின் பவள விழா பொதுக்கூட்டத்தை மிகப் பிரம்மாண்ட முறையில் நடத்த ஏற்பாடுகள் செய்து வருகிறோம். இக்கூட்டத்தில் திமுக தலைவரும், முதல்வருமான மு.க.ஸ்டாலின் தலைமையில், தோழமைக் கட்சித் தலைவா்கள் அனைவரும் பங்கேற்கவுள்ளனா். தமிழகம் முழுவதும் இருந்து சுமாா் 50,000 போ் பங்கேற்பாா்கள்.தமிழக இளைஞா் நலன் மற்றும் விளையாட்டுத்துறை அமைச்சா் உதயநிதி ஸ்டாலின் துணை முதல்வராக எப்போது அறிவிக்கப்படுவாா் என்ற கேள்விக்கு நாளையே அறிவிப்பு வந்தாலும் ஆச்சரியமில்லை.

காஞ்சிபுரத்தில் நடைபெறும் இக்கூட்டத்திலும் துணை முதல்வராக அறிவிக்க வாய்ப்புள்ளது எனவும் தா.மோ.அன்பரசன் தெரிவித்தாா்.