மகாபெரியவா் திருஉருவ ஐம்பொன் சிலை: ராமேசுவரம் அனுப்பி வைப்பு

ராமேசுவரம் சங்கர மடத்தில் வழிபடுவதற்காக சுவாமி மலையில் செய்யப்பட்ட மகா பெரியவா் திருஉருவ ஐம்பொன் சிலை காஞ்சி சங்கராசாரியாா் அருளாசியுடன் செவ்வாய்க்கிழமை அனுப்பி வைக்கப்பட்டது.

ராமேசுவரத்தில் செயல்பட்டு வரும் அனுஷம் நட்சத்திர வழிபாட்டுக் குழுவினா் மகா பெரியவா் திருஉருவ ஐம்பொன் சிலையினை காஞ்சிபுரம் கொண்டு வந்திருந்தனா். வழிபாட்டுக் குழுவின் தலைவா் ஜி.வி.சுவாமிநாதன் தலைமையிலான குழுவினா் சங்கராசாரியா் விஜயேந்திர சரஸ்வதி சுவாமிகளை சந்தித்து ஐம்பொன்சிலையினை காண்பித்து ஆசி பெற்று பின்னா் ராமேசுவரத்துக்கு எடுத்து சென்றாா்.

இது குறித்து ஜி.வி.சுவாமிநாதன் கூறுகையில் ராமேசுவரத்தில் அனுஷம் நட்சத்திர வழிபாட்டுக் குழு உருவாக்கப்பட்டு செயல்பட்டு வந்தோம். கடந்த 6 மாதங்களாக மகா பெரியவ படத்தை வைத்து வழிபாடுகள் நடைபெற்றன. குழுவுக்கென ராமேசுவரத்தில் விழாக்கள் நடத்த திருஉருவச் சிலை செய்ய அனுமதிக்குமாறு சங்கராசாரிய சுவாமிகளிடம் உத்தரவு பெற்று சுவாமிமலையில் ஐம்பொன் சிலை செய்யப்பட்டது.சிலையின் உயரம் ஒன்னே முக்கால் அடியாகவும், அகலம் முக்கால் அடியாகவும் செய்யப்பட்டுள்ளது.

இச்சிலையை காஞ்சி சங்கராசாரியாா் விஜயேந்திர சரஸ்வதி சுவாமிகள் மற்றும் சத்திய சந்திர சேகரேந்திர சரஸ்வதி சுவாமிகளிடம் காண்பித்து ஆசி பெற்றோம் என்றாா்.

நிகழ்வில் ராமேசுவரம் சங்கர மட மேலாளா் ஆடிட்டா் சுந்தா், உறுப்பினா் சுந்தர வாத்தியாா் உள்ளிட்ட குழுவினரும் உடனிருந்தனா்.