மின்சாரம் பாய்ந்து இறந்த சிறுவன் குடும்பத்துக்கு ரூ.4 லட்சம் நிவாரணம்: அமைச்சா் வழங்கினாா்

அரக்கோணம்: அரக்கோணத்தில் மின்சாரம் பாய்ந்து இறந்த சிறுவன் குடும்பத்துக்கு அரசின் நிவாரணத் தொகை ரூ.4 லட்சம், சொந்த நிதி ரூ.50,000-ஐ கைத்தறி அமைச்சா் ஆா். காந்தி வழங்கினாா்.

அரக்கோணம் விண்டா்பேட்டையைச் சோ்ந்த சபீரின் மகன் ரிஸ்வான்(12). ஞாயிற்றுக்கிழமை சிறுவன் ரிஸ்வான் வீட்டில் மின் சுவிட்ச்சை போட்டபோது மின்சாரம் பாய்ந்து உயிரிழந்தாா். இச்சம்பவம் குறித்து அறிந்த தமிழக அரசு, இயற்கை பேரிடா் நிதியில் இருந்து ரூ.4 லட்சம் நிவாரணம் அறிவித்தது.

இதைத் தொடா்ந்து திங்கள்கிழமை சிறுவன் ரிஸ்வானின் வீட்டுக்கு அமைச்சா் ஆா்.காந்தி அஞ்சலி செலுத்தினாா். தொடா்ந்து சிறுவனின் பெற்றோருக்கு ஆறுதல் கூறி, நிவாரணத் தொகை ரூ.4 லட்சம் மற்றும் சொந்த நிதியாக ரூ.50,000 ரொக்கத்தையும் அமைச்சா் காந்தி வழங்கினாா்.

இந்நிகழ்வில் ஆட்சியா் ஜெ.யு.சந்திரகலா, கோட்டாட்சியா் வெங்கடேசன். நகா்மன்றத் தலைவா் லட்சுமிபாரி, வட்டாட்சியா் ஸ்ரீதேவி, நகர திமுக செயலா் வி.எல்.ஜோதி உள்ளிட்டோா் உடனிருந்தனா்.