தடுப்புச் சுவா் மீது மோதியதில் இளைஞா் உயிரிழப்பு

நாட்டறம்பள்ளி அருகே சாலையோர தடுப்பு மீது பைக் மோதிய விபத்தில் தவறி விழுந்து இளைஞா் உயிரிழந்தாா்.

திருப்பத்தூா் மாவட்டம், ஆம்பூா் பகுதியைச் சோ்ந்தவா் முகமதுசாத்(28). இவா் தனியாா் பால் விற்பனை நிறுவனத்தில் வேலை செய்து வந்தாா். வியாழக்கிழமை இரவு கிருஷ்ணகிரியில் இருந்து வாணியம்பாடி நோக்கி பைக்கில் வந்து கொண்டிருந்தாா். அப்போது சென்னை - பெங்களூரு தேசிய நெடுஞ்சாலையில் நாட்டறம்பள்ளி பங்களாமேடு பகுதியில் வந்தபோது, திடீரென சாலையோர தடுப்பு மீது பைக் மோதி நிலைதடுமாறி கீழே விழுந்ததில் முகமதுசாத் நிகழ்விடத்திலேயே உயிரிழந்தாா்.

விபத்து குறித்து நாட்டறம்பள்ளி போலீஸாா் வழக்குப் பதிவு செய்து விசாரித்து வருகின்றனா்.