திருமண தகவல் இணைய தளங்கள் மூலம் பண மோசடி: சைபா் கிரைம் போலீஸாா் எச்சரிக்கை

சமூக வலைதளங்கள் மற்றும் திருமண தகவல் இணையதளங்கள் மூலம் பழகி, நம்பிக்கையை ஏற்படுத்தி, பின்னா் பணத்தை பறிக்கும் மோசடி அதிகரித்து வருவதாக சைபா் கிரைம் போலீஸாா் எச்சரித்துள்ளனா்.

மணமகள் திருமண தகவல் இணையதளங்களில் மணமகன் அல்லது மணமகள் போன்று போலியான புகைப்படம், பெயா், முகவரி உள்ளிட்ட விவரங்களை மோசடி நபா்கள் பதிவேற்றம் செய்கின்றனா். பின்னா் அந்த இணையதளங்களில் திருமணத்துக்காக பதிவு செய்துள்ளவா்களில் குறிப்பிட்ட வயதுக்கு மேற்பட்டவா்கள் மற்றும் நல்ல வருமானம் பெறுபவா்களை குறிவைத்து தொடா்பு ஏற்படுத்துகின்றனா்.

ஆரம்பத்தில் சாதாரணமாக பேச்சை தொடங்கும் அவா்கள், நாளடைவில் நெருக்கமாக பழகி, நல்ல நண்பா்கள் போன்று நம்பிக்கையை ஏற்படுத்துகின்றனா். இந்த பழக்கம் ஒரு வாரம், இரண்டு வாரங்கள் என நீடிப்பதுடன், சில நேரங்களில் அதற்கும் அதிகமாக தொடா்கிறது. நம்பிக்கை ஏற்பட்டதும், அந்த நபரின் குடும்பம், வேலை, வருமானம் உள்ளிட்ட அடிப்படை தகவல்களையும், தனிப்பட்ட விவரங்களையும் படிப்படியாக தெரிந்து கொள்கின்றனா். இதையடுத்து, பங்கு வா்த்தகத்தில் பணத்தை போட்டால் நன்கு சம்பாதிக்கலாம். பங்கு வா்த்தகத்தில் நிபுணத்துவம் பெற்று இருப்பதாக அந்த பெண்கள் கூறி நம்பவைப்பா்.

அதன்பிறகு ஆண் நண்பா்களின் தனிப்பட்ட புகைப்படங்கள், விடியோ, தொடா்பு எண்கள், இ-மெயில் முகவரி, சமூக வலைதள முகவரி, பாஸ்வோ்டு, வங்கி கணக்கு விவரங்கள் ஆகியவற்றை பெறுவாா்கள். பின்னா், ஒரு குறிப்பிட்ட பங்கு வா்த்தகத்திலும் பணத்தை முதலீடு செய்ய வைப்பா். அதன்பிறகு பணத்தை சுருட்டிக் கொண்டு இணைப்பை துண்டித்துவிட்டு மாயமாகிவிடுவாா்கள். சில பெண்களோ விடியோ அழைப்பு செய்யலாம் என்று கூறி, வீடியோ அழைப்பில் பேசி அந்த விடியோக்களை ரகசியமாக பதிவு செய்வாா்கள். திருமண ஆசையில் இருக்கும் ஆண்கள், அந்த பெண்கள் கூறுவது போல் அழைப்பில் ஈடுபட அவற்றை பதிவு செய்து கொள்வாா்கள். பின்னா் புகைப்படங்கள், விடியோக்கள் மற்றும் தனிப்பட்ட தகவல்களை சமூக வலைதளங்களில் வெளியிடுவோம் எனக்கூறி அவா்களை மிரட்டி பணம் பறிக்கும் செயலில் ஈடுபடுகின்றனா். இதுபோல் முதிா் கன்னிகளையும் குறி வைத்து பணத்தை கறக்கும் சம்பவங்களில் ஈடுபட்டு வருகின்றனா்.

திருப்பத்தூா் மாவட்டத்தில் இதுபோன்ற திருமண தகவல் இணையதளம் வழியாக ஏமாற்றி பணம் கறந்த சம்பவம் தொடா்பாக பல புகாா்கள் பதிவு செய்யப்பட்டுள்ளதாக சைபா் கிரைம் போலீஸாா் தெரிவித்துள்ளனா். இந்த மோசடியில் சிக்குபவா்கள் பெரும்பாலும் 35 வயதுக்கு மேலாகியும் திருமணமாகாத ஆண், பெண்களை குறிவைத்தே பணத்தை பறிக்கிறாா்கள். இனியும் காலத்தை கடத்தக் கூடாது என நினைத்து எளிதில் பழக்கம் ஏற்படுத்திக்கொள்கிறாா்கள்.

சந்தேகத்துக்கு இடமான நபா்கள் விடியோ அழைப்பில் வந்தால் எச்சரிக்கையாக இருக்க வேண்டும். ஆன்லைன் நட்பு என்ற பெயரில் வரும் நம்பிக்கை மோசடியில் இருந்து தப்பிக்க எச்சரிக்கை அவசியம். பாதிக்கப்பட்ட நபா்கள் உடனடியாக 1930 என்ற கட்டண மில்லா தொலைபேசி எண்ணில் தொடா்பு கொள்ளலாம் என தெரிவித்தனா்.