திருவள்ளூர் அருகே சப்தகிரி ரயிலில் இயந்திரக் கோளாறு ஒரு மணிநேரம் பயணிகள் அவதி

திருவள்ளூர் அருகே சப்தகிரி விரைவு ரயிலில் ஏற்பட்ட இயந்திரக் கோளாறு காரணமாக நடுவழியில் ரயில் ஒரு மணிநேரம் நின்றததால் பயணிகள் மிகவும் அவதிக்குள்ளாகினர்.    
 சென்னை சென்ட்ரல் ரயில் நிலையத்தில் இருந்து அரக்கோணம் வழியாக திருப்பதி வரையில் செல்லும் சப்தகிரி விரைவு ரயில் ஞாயிற்றுக்கிழமை காலை 6.30 மணிக்கு புறப்பட்டுச் சென்றது. இந்த ரயிலில் ஏராளமான பயணிகள் பயணம் மேற்கொண்டனர். இந்நிலையில் திருவள்ளூர் ரயில் நிலையத்தை கடந்து சென்று கொண்டிருக்கும் போது செஞ்சிபானம்பாக்கம்-மணவூர் ரயில் நிலையங்களுக்கு இடையே இயந்திரக் கோளாறு காரணமாக திடீரென நடுவழியில் நின்றது. இதனால், அதிர்ச்சி அடைந்த பயணிகள் ரயில் ஓட்டுநரிடம் விவரம் கேட்டனர்.
   அப்போது இயந்திரக்கோளாறு என அவர் தெரிவித்துள்ளார். இதைத் தொடர்ந்து ஓட்டுநர் கொடுத்த தகவலின் பேரில் சென்னை சென்ட்ரல் மற்றும் அரக்கோணத்திலிருந்து ரயில்வே அதிகாரிகள் விரைந்து சம்பவ இடத்திற்கு விரைந்து வந்தனர். அதற்குள் ஓட்டுநர் இயந்திரக் கோளாறை சரி செய்தவுடன் சரியாக 8.30 மணிக்கு புறப்பட்டுச் சென்றது. இதனால் பயணிகள் ஒரு மணிநேரம் வரையில் அவதிக்குள்ளாகினர். மேலும், இந்த ரயில் நடுவழியில் நின்றதால், அதற்கு பின்னால் வந்த விரைவு ரயில்களும், புறநகர் மின்சார ரயில்களும் செல்ல முடியாமல் பயணிகள் மிகவும் சிரமத்திற்கு உள்ளாகினர்.