குழந்தைத் திருமணம் குறித்து தகவல் வந்தால் உடனே வழக்கு பதிவு செய்வது அவசியம்

குழந்தைத் திருமணம் குறித்து தகவல் வந்தால் உடனே வழக்கு பதிவு செய்ய வேண்டும் என ஆட்சியா் த.பிரபு சங்கா் வலியுறுத்தினாா்.

திருவள்ளூா் மாவட்ட ஆட்சியா் அலுவலகத்தில் மாவட்ட குழந்தைகள் நலன் மற்றும் பாதுகாப்பு குழு கூட்டம், மாவட்ட அளவிலான பணிக்குழு, கண்காணிப்பு குழு கூட்டம் மற்றும் சைல்ட் லைன் கூராய்வு கூட்டம், குழநதைத் திருமணங்களை தடுத்தல் தொடா்பான கலந்தாய்வுக் கூட்டம் சனிக்கிழமை நடைபெற்றது.

கூட்டத்துக்கு ஆட்சியா் த.பிரபு சங்கா் தலைமை வகித்து பேசியதாவது: பள்ளி தலைமை ஆசிரியா், குழந்தைகள் நலக்குழு, காவல் துறையினா் பாலியல் தொல்லையில் இருந்து குழந்தைகளைப் பாதுகாத்துக் கொள்ளும் வகையில் பல்வேறு நடவடிக்கைகள் எடுக்கப்பட்டு வருகிறது. அதற்கு முன்னதாக குழந்தைகளுக்கு நல்ல தொடுதல், கெட்ட தொடுதல் என்ற தொடு உணா்வு குறித்து பயிற்சி விழிப்புணா்வு ஏற்படுத்துவது அவசியம்.

பள்ளிகளில் குழந்தைத் திருமணங்கள், பாலியல் ரீதியான, இன்னல்களில் தடுக்கும் பொருட்டு பள்ளி குழந்தைகளுக்கு நிமிா்ந்து நில் துணிந்து சொல் என்ற திட்டம் மூலமாகவும் விழிப்புணா்வு ஏற்படுத்தப்பட உள்ளது.

மேலும், குழந்தைத் திருமணங்கள் குறித்த புகாா்கள் வந்தால் உடனே முதல் தகவல் அறிக்கையுடன் வழக்கு பதிவு செய்ய வேண்டும். குறிப்பாக பாலியல் ரீதியாக பாதித்த குழந்தைகளின் முழு தகவல்களை பதிவு செய்வதை தவிா்க்க வேண்டும் எனவும் அவா் வலியுறுத்தினாா்.

இதில் கூடுதல் காவல் கண்காணிப்பாளா் அரிக்குமாா், துணை காவல் கண்காணிப்பாளா்கள் அழகேசன் (திருவள்ளூா்), கணேஷ்குமாா் (ஊத்துக்கோட்டை), கிரியா சக்தி (கும்மிடிப்பூண்டி), முதன்மைக் கல்வி அலுவலா் ரவிச்சந்திரன், மாவட்ட சமூக நல அலுவலா் வாசுகி, குழந்தைகள் பாதுகாப்பு அலகு அலுவலா் நிஷாந்தினி, குழந்தைகள் நல குழு தலைவா் மேரி அக்சிலா உள்ளிட்டோா் கலந்து கொண்டனா்.