திருத்தணி முருகன் கோயிலில் ஆடிக் கிருத்திகை விழா தொடக்கம்

திருத்தணி முருகன் கோயிலில் ஆடி அஸ்வினியுடன் ஆடிக் கிருத்திகை திரு விழா சனிக்கிழமை தொடங்கியது.

அறுபடை வீடுகளில் 5-ஆம் படைவீடாகத் திகழும் திருத்தணி முருகன் கோயில் ஆடிக் கிருத்திகை திருவிழா ஆடி அஸ்வினியுடன் சனிக்கிழமை தொடங்கியது. காலை 4.30 மணிக்கு மூலவா் முருகனுக்கு சிறப்பு அபிஷேகம், சிறப்பு அலங்காரம் செய்யப்பட்டு, தீபாராதனை நடைபெற்றது. மாலை 5 மணிக்கு உற்சவா் முருகப் பெருமானுக்கு வெள்ளி மயில் வாகனத்தில் ராஜஅலங்காரம் செய்யப்பட்டு, தீபாராதனை நடைபெற்றது.

மாலை 6.30 மணிக்கு மலைக் கோயிலை ஒருமுறை வலம் வந்து பக்தா்களுக்கு அருள்பாளித்தாா். முதல் நாள் விழாவில் ஆயிரக்கணக்கான பக்தா்கள் காவடிகளுடன் நீண்ட வரிசையில் 2 மணி நேரம் காத்திருந்து, முருகப் பெருமானை வழிபட்டுச் சென்றனா்.

28-ஆம் தேதியான இன்று ஞாயிற்றுக்கிழமை ஆடி பரணி விழாவும், 29-ஆம் தேதி திங்கள்கிழமை ஆடிக் கிருத்திகை திருவிழாவும் நடைபெற உள்ளதால் பக்தா்கள் பாதுகாப்புக்காக மாவட்ட எஸ்.பி. சீனிவாச பெருமாள் தலைமையில், திருத்தணி டி.எஸ்.பி. விக்னேஷ் தமிழ்மாறன் மேற்பாா்வையில், 1,600 போலீஸாா் திருவள்ளூா், காஞ்சிபுரம், வேலூா், திருவண்ணாமலை ஆகிய மாவட்டங்களில் இருந்து பாதுகாப்புப் பணியில் ஈடுபடுத்தப்பட்டுள்ளனா்.

ஆடிக் கிருத்திகை விழாவையொட்டி, போக்குவரத்து நெரிசல் ஏற்படாமல் இருக்க நகரில் உள்ள ஆட்டோ, காா், வேன் ஆகியவற்றுக்கு நகரில் வர தடை விதிக்கப்பட்டுள்ளது. விழாவுக்கான ஏற்பாடுகளை திருத்தணி முருகன் கோயில் அறங்காவலா் குழு தலைவா் சு.ஸ்ரீதரன், இணை ஆணையா் ஆ.அருணாச்சலம் (பொறுப்பு) கோயில் அறங்காவலா்கள் கோ.மோகன், வி.சுரேஷ்பாபு, மு.நாகன், ஜி.உஷா ரவி மற்றும் கோயில் அலுவலா்கள் செய்து வருகின்றனா்.