7 அம்சக் கோரிக்கைகளை வலியுறுத்தி கிராம உதவியாளர்கள் தற்செயல் விடுப்பு போராட்டம்

மாவட்டத்தின் பல்வேறு பகுதிகளில் தமிழ்நாடு வருவாய்த் துறை கிராம உதவியாளர் சங்கத்தினர் 7 அம்சக் கோரிக்கைகளை வலியுறுத்தி புதன்கிழமை  ஒட்டுமொத்த தற்செயல் விடுப்பு எடுத்து போராட்டத்தில் ஈடுபட்டனர்.
கிராம உதவியாளர்களுக்கு அலுவலக உதவியாளர்களுக்கு இணையான அடிப்படை ஊதியம் வழங்க வேண்டும். காலமுறை ஊதியத்தில் பணியாற்றும் ஊழியர்களுக்கு வழங்கப்படும் ஓய்வூதியம் போன்று கிராம உதவியாளர்களுக்கும் கடைசி மாத ஊதியத்தில் 50 சதவீதம் கணக்கிட்டு வழங்க வேண்டும் என்பன உள்ளிட்ட கோரிக்கைகளை வலியுறுத்தி இந்தப் போராட்டம் நடைபெற்றது.
கீழ்பென்னாத்தூர் வட்டாட்சியர் அலுவலகம் எதிரே நடைபெற்ற போராட்டத்துக்கு சங்கத்தின் வட்டத் தலைவர் சுந்தரம் தலைமை வகித்தார். செயலர் பிரபாகரன், துணைத் தலைவர் உத்திரகுமார், இணைச் செயலர் கங்கா பவானி, மாநிலச் செயற்குழு உறுப்பினர் எம்.குணசீலன் ஆகியோர் முன்னிலை வகித்தனர். சங்கத்தின் மாவட்டச் செயற்குழு உறுப்பினர் கே.செல்வராஜ் கோரிக்கைகளை விளக்கிப் பேசினார்.
கோரிக்கையை வலியுறுத்தி 2-ஆம் கட்டமாக இந்தப் போராட்டம் நடைபெற்றது. மூன்றாம் கட்டமாக வரும் 27-ஆம் தேதி திருவண்ணாமலை மாவட்ட ஆட்சியர் அலுவலகம் எதிரே நடைபெறும் தர்னா போராட்டத்தில் திரளானோர் கலந்து கொள்வது என முடிவு செய்யப்பட்டது. போராட்டத்தில், சங்கத்தின் வட்டப் பொருளாளர் ராமதாஸ் மற்றும் 65 கிராம உதவியாளர்கள் கலந்து கொண்டனர்.
வந்தவாசியில்...: வந்தவாசி வட்டாட்சியர் அலுவலகம் முன் நடைபெற்ற போராட்டத்தில் சங்கத்தின் மாவட்டத் தலைவர் 
எம்.பிரபாகரன், வட்டத் தலைவர் டி.ஜி.சுப்பிரமணியன், மாவட்ட இணைச் செயலர் எஸ்.புனிதா, வட்ட துணைத் தலைவர் பிரகாஷ் உள்ளிட்டோர் பங்கேற்றனர்.