வேலூர் மாவட்ட வருவாய் அலுவலர் திடீர் மாற்றம்

வேலூர் மாவட்ட வருவாய் அலுவலர் தா.செங்கோட்டையன், தமிழக ஆளுநரின் துணைச் செயலராக மாற்றப்பட்டுள்ளார்.
வேலூர் மாவட்ட வருவாய் அலுவலராக பணியாற்றி வருபவர் தா.செங்கோட்டையன். இவர் கடந்த ஓராண்டாக இங்கு பணியில் இருந்து வந்தார். இந்நிலையில், தமிழகம் முழுவதும் அனைத்து மாவட்ட வருவாய் அலுவலர்களின் பணி குறித்த கோப்புகளை தமிழக ஆளுநர் பன்வாரிலால் புரோஹித் ஆய்வு செய்தார். இதில், வேலூர் மாவட்ட வருவாய் அலுவலர் தா.செங்கோட்டையன் எவ்வித குற்றச்சாட்டுகளுக்கும் ஆளாகாமல் சிறப்பாகப் பணி செய்து வந்ததை அறிந்தார். இதையடுத்து தமிழக ஆளுநரின் பரிந்துரைக்கு ஏற்ப செங்கோட்டையனை தமிழக ஆளுநரின் துணைச் செயலராக இடமாற்றம் செய்து தமிழக அரசு புதன்கிழமை உத்தரவிட்டுள்ளது. 
செங்கோட்டையன் இடமாற்றம் செய்யப்பட்டதை அடுத்து, வேலூர் மாவட்ட வருவாய் அலுவலராக உடனடியாக யாரும் நியமிக்கப்படவில்லை. புதிய மாவட்ட வருவாய் அலுவலர் நியமிக்கப்படும் வரை அந்தப் பணியை கூடுதலாக ஆட்சியர் எஸ்.ஏ.ராமன் கவனிப்பார் என அதிகாரிகள் வட்டாரத்தில் தெரிவிக்கப்பட்டது.