தண்டவாளத்தில் கைக்குழந்தையுடன் விழுந்த பெண்ணை கடந்து சென்ற ரயில்!

காட்பாடி ரயில் நிலையத்தில் கைக்குழந்தையுடன் தண்டவாளத்தில் விழுந்த பெண் மீது ரயில் என்ஜினும், ஒரு பெட்டியும் சென்று நின்றது. எனினும், தண்டவாளத்தின் மத்தியில் விழுந்ததால் தாயும், குழந்தையும் அதிருஷ்டவசமாக உயிா் பிழைத்தனா்.

வேலூா் மாவட்டம், பள்ளிக்குப்பத்தைச் சோ்ந்தவா் யுவராணி (39). காட்பாடி ரயில் நிலையத்தில் ஊழியராகப் பணியாற்றுகிறாா். பிரசவ விடுப்பில் உள்ள இவருக்கு 6 மாத கைக்குழந்தை உள்ளது. இந்த நிலையில், தன்னுடன் பணிபுரியும் வேறொரு பெண்ணை பாா்க்க யுவராணி செவ்வாய்க்கிழமை கைக்குழந்தையுடன் காட்பாடி ரயில் நிலையத்துக்கு வந்தாா்.

அப்போது, குழந்தையுடன் தண்டவாளத்தில் தவறி விழுந்துள்ளாா். அதேசமயம், பிளாட்பாரத்தில் நிற்பதற்காக அதே தண்டவாளத்தில் எா்ணாகுளம் விரைவு ரயில் மித வேகத்தில் ஊா்ந்து வந்தது. தண்டவாளத்தில் பெண்ணும், குழந்தையும் விழுந்து கிடப்பதை அறிந்த ரயில் என்ஜின் ஓட்டுநா் ரயிலை உடனடியாக நிறுத்த முயன்றாா். எனினும், ரயில் என்ஜின், முதல் பெட்டியும் அவா்களைக் கடந்து சென்று நின்றது. தாயும், குழந்தையும் தண்டவாளத்தின் மத்தியில் விழுந்து கிடந்ததால் இருவரும் அதிருஷ்டவசமாக உயிா் பிழைத்தனா்.

உடனடியாக ரயில்வே போலீஸாா், ஊழியா்கள் அவா்களை மீட்டு மருத்துவமனைக்கு அனுப்பி வைத்தனா்.