வட மாநிலத் தொழிலாளா்களுக்கு பாதுகாப்பான சூழல்: நிறுவனங்களுக்கு வேலூா் எஸ்.பி. அறிவுறுத்தல்

வட மாநிலத் தொழிலாளா்களுக்கு பாதுகாப்பான சூழலை உருவாக்கித் தர வேண்டியது நிறுவனங்களின் கடமை என்று வேலூா் மாவட்ட காவல் கண்காணிப்பாளா் எஸ்.ராஜேஷ் கண்ணன் அறிவுறுத்தினாா்.

வட மாநிலத் தொழிலாளா்கள் மீது அச்சுறுத்தல் நடைபெறுவதைத் தடுக்க தமிழக காவல் துறை சாா்பில் விழிப்புணா்வு நடவடிக்கைகள் மேற்கொள்ளப்பட்டு வருகின்றன.

அதன்படி, வேலூா் மாவட்ட காவல் துறை சாா்பில், காவலா் மன்றத்தில் வட மாநிலத் தொழிலாளா்களை பணிக்கு அமா்த்தியுள்ள நிறுவனங்களுக்கான விழிப்புணா்வுக் கூட்டம் வெள்ளிக்கிழமை நடைபெற்றது.

கூட்டத்துக்கு மாவட்ட காவல் கண்காணிப்பாளா் எஸ்.ராஜேஷ் கண்ணன் தலைமை வகித்துப் பேசியது:

தொழில் நிறுவனங்கள், கடைகளில் அமா்த்தப்படும் வடமாநில தொழிலாளா்களின் அனைத்து ஆவணங்களையும் பெற வேண்டும். அவா்களுக்கு பாதுகாப்பான சூழலை உருவாக்கித் தரவேண்டும். அவா்களின் குறைகளைக் கண்டறிந்து அதை நிவா்த்தி செய்ய வேண்டும். ஏதேனும் புகாா் இருந்தால் மாவட்ட காவல் துறைக்கு தகவல் தெரிவிக்க வேண்டும். வேலைக்கு அமா்த்தும்போது அவா்களின் விரல்ரேகைகளையும் பதிவு செய்து கொள்ள வேண்டும் என்றாா்.

கூட்டத்தில் மாவட்ட கூடுதல் காவல் கண்காணிப்பாளா் பாஸ்கரன், துணைக் காவல் கண்காணிப்பாளா் திருநாவுக்கரசு, காவல் ஆய்வாளா்கள் ரஜினிகாந்த், ரவி உள்ளிட்டோா் பங்கேற்றனா்.