காரமடையில் தாசர்களுக்கு பக்தர்கள் படையல் அர்ப்பணம்

மேட்டுப்பாளையம், அக். 8: வைணவக் கோவில்களில் பிரசித்தி பெற்ற காரமடை அரங்கநாதர் திருக்கோவிலில் புரட்டாசி 4வது சனிக்கிழமையை முன்னிட்டு, அதிகாலை முதலே கோவிலில் குவிந்த பக்தர்கள், நீண்ட வரிசையில் காத்திருந்து பெருமாளை வணங்கி, தாசர்களுக்கு படையலிட்டனர் (படம்).

 ÷இத் திருக்கோவிலில், புரட்டாசி மாதத்தில் வரும் 5 சனிக்கிழமைகளையும் பக்தர்கள் விரதமிருந்து சிறப்பாகக் கொண்டாடுவது வழக்கம். நேற்று 4வது புரட்டாசி சனிக்கிழமை விழா சிறப்பாக நடைபெற்றது. இதையொட்டி, அதிகாலை 3 மணிக்கு அரங்கநாதப் பெருமாளுக்கு சிறப்பு அபிஷேக பூஜையும், 5 மணிக்கு திருக்கோவில் நடைத்திறப்பும் நடைபெற்றன.

 ÷அதன் பின்னர், அரங்கநாதப் பெருமாள் உட்பிரகாரத்தை வலம்வந்தார்; ஸ்ரீதேவி, பூதேவியுடன் திருக்கல்யாண மண்டபத்தில் வீற்றிருந்து பக்தர்களுக்கு காட்சி கொடுத்தார். அதிகாலை முதலே கோவிலில் குவிந்த பக்தர்கள், நீண்ட வரிசையில் காத்திருந்து அரங்கனை தரிசித்தனர்.

 ÷தரிசனத்திற்குப் பின்னர், திருக்கோவிலை வலம் வந்த பக்தர்கள், கோவில் வளாகத்தில் அமர்ந்திருந்த ஆயிரக் கணக்கான தாசர்களுக்கு அரிசி, பருப்பு, காய்கறிகளைப் படையலிட்டு, அவர்களிடம் ஆசி பெற்றுச் சென்றனர்.