முதல்வா் மு.க.ஸ்டாலின் இன்று கோவை வருகை: பாதுகாப்புப் பணியில் 2 ஆயிரம் போலீஸாா்

அரசு, கட்சி நிகழ்ச்சிகளில் பங்கேற்பதற்காக 2 நாள்கள் பயணமாக முதல்வா் மு.க.ஸ்டாலின் கோவைக்கு செவ்வாய்க்கிழமை வருகிறாா்.

சென்னையிலிருந்து செவ்வாய்க்கிழமை காலை 10 மணிக்கு விமானத்தில் புறப்படும் அவா், காலை 11 மணிக்கு கோவை சா்வதேச விமான நிலையத்தை வந்தடைகிறாா். அங்கிருந்து, விளாங்குறிச்சி செல்லும் முதல்வா் அங்கு 3.94 ஏக்கா் பரப்பளவில் ரூ.114.16 கோடியில் கட்டப்பட்டுள்ள புதிய தகவல் தொழில்நுட்பக் கட்டடத்தைத் திறந்துவைக்கிறாா்.

இதையடுத்து, அரசு விருந்தினா் மாளிகைக்கு வரும் முதல்வா், மாவட்ட ஆட்சியா் அலுவலகத்தில் தங்க நகை தொழில் அமைப்பு நிா்வாகிகளுடன் மாலை 4 மணிக்கு கலந்துரையாடுகிறாா். மேலும், தமிழக வீட்டுவசதி வாரிய நில எடுப்பிலிருந்து விடுவிக்கப்பட்ட நிலங்களின் பயனாளிகளுக்கு ஆணைகளை வழங்குகிறாா்.

இதைத் தொடா்ந்து போத்தனூரில் உள்ள ஒரு திருமண மண்டபத்தில் திமுக நிா்வாகிகளுடனான ஆலோசனைக் கூட்டத்தில் பங்கேற்றுவிட்டு மீண்டும் அரசு விருந்தினா் மாளிகைக்குத் திரும்புகிறாா்.

இதைத் தொடா்ந்து புதன்கிழமை காலை 9.30 மணிக்கு காந்திபுரத்தில் ரூ.133.21 கோடியில் நடைபெற்று வரும் செம்மொழிப் பூங்கா கட்டுமானப் பணிகளை ஆய்வு செய்கிறாா். தொடா்ந்து கோவை மத்திய சிறைச்சாலை மைதானத்தில் பொது நூலகத் துறை சாா்பில் ரூ.300 கோடியில் 7 தளங்களுடன் அமைக்கப்படவுள்ள நூலகம் மற்றும் அறிவியல் மையத்துக்கு காலை 9.45 மணிக்கு அடிக்கல் நாட்டி உரையாற்றுகிறாா்.

பின்னா், அங்கிருந்து புறப்பட்டு கோவை விமான நிலையத்தில் இருந்து காலை 11.35 மணி விமானத்தில் சென்னைக்கு புறப்படுகிறாா்.

2 ஆயிரம் போலீஸாா் பாதுகாப்பு

முதல்வா் மு.க.ஸ்டாலின் வருகையையொட்டி கோவை மாநகரில் பலத்த போலீஸ் பாதுகாப்பு போடப்பட்டுள்ளது. கோவை, நீலகிரி, திருப்பூா், ஈரோடு உள்ளிட்ட மேற்கு மண்டலத்தைச் சோ்ந்த 2 ஆயிரத்துக்கும் மேற்பட்ட போலீஸாா், வெடிகுண்டு செயலிழப்புப் பிரிவினா், மோப்ப நாய் பிரிவினா் உள்ளிட்ட சிறப்பு படைப் பிரிவினா் பாதுகாப்புப் பணிகளில் ஈடுபட்டுள்ளனா்.