மத்திய சிறையில் போலீஸார் ஆய்வு:கூர்மையான ஆயுதங்கள் பறிமுதல்

கோவை மத்திய சிறையில் போலீஸார் ஞாயிற்றுக்கிழமை நடத்திய திடீர் சோதனையில் கைதிகள் மறைத்து வைத்திருந்த கத்தி போன்ற கூரிய ஆயுதங்கள் பறிமுதல் செய்யப்பட்டன.
  கோவை மத்திய சிறையில் கைதிகளிடையே போதைப் பொருள் புழக்கம் அதிகரித்திருப்பதாக போலீஸாருக்குத் தகவல் கிடைத்தது. இதன்பேரில் அடிக்கடி அங்கே சோதனை மேற்கொள்ளப்பட்டு வருகிறது. அண்மையில், கைதிகளுக்கு இடையே ஏற்படவிருந்த மோதல் தடுக்கப்பட்டது. 
 இந்நிலையில் பல்வேறு கும்பல்களாகப் பிரிந்துள்ள கைதிகள் இடையே மோதல் ஏற்பட உள்ளதாக போலீஸாருக்கு மீண்டும் தகவல் கிடைத்தது. இதன்பேரில் காவல் உதவி ஆணையர்(சட்டம், ஒழுங்கு) சுந்தரராஜன் தலைமையில் 40க்கும் மேற்பட்ட காவலர்கள் கோவை மத்திய சிறையில் ஞாயிற்றுக்கிழமை சோதனையிட்டனர். அப்போது,  கைதிகள் சிலர், சாப்பாட்டுத் தட்டை மடித்து கத்தி போன்ற கூர்மையான ஆயுதங்களாக மாற்றி வைத்திருந்தது தெரியவந்தது. 
இவற்றை போலீஸார் பறிமுதல் செய்து சம்பந்தப்பட்ட கைதிகளிடம் தொடர் விசாரணை மேற்கொண்டனர்.