கழிவுநீா் சுத்திகரிப்பு நிலைய கட்டுமானப் பணிகள்: மாநகராட்சி ஆணையா் ஆய்வு

கோவை கிழக்கு மண்டலம், நஞ்சுண்டாபுரத்தில் நடைபெற்றும் வரும் கழிவுநீா் சுத்திகரிப்பு நிலைய கட்டுமானப் பணிகளை மாநகராட்சி ஆணையா் ராஜகோபால் சுன்கரா வியாழக்கிழமை ஆய்வு நடத்தினாா்.

கோவை மாநகராட்சி, வடக்கு மண்டலம் 43ஆவது வாா்டுக்கு உள்பட்ட வெள்ளக்கிணறு பகுதியில் கரோனா நோய்த் தடுப்பு நடவடிக்கைகளை மாநகராட்சி ஆணையா் ராஜகோபால் சுன்கரா வியாழக்கிழமை ஆய்வு மேற்கொண்டாா்.

அப்போது, தூய்மைப் பணியாளா்கள் நேரம் தவறாமல் பணிபுரிய வேண்டும். மக்கும், மக்காத குப்பைகளை தரம் பிரித்து சேகரிக்க வேண்டும். முகக் கவசம் அணிந்து பணியாற்ற வேண்டும். அனைவரும் தடுப்பூசி செலுத்திக் கொள்ள வேண்டும் என அறிவுறுத்தினாா்.

இதைத் தொடா்ந்து, துடியலூா் ஆா்.எஸ்.சாலை மாநகராட்சிப் பிரிவு அலுவலக வளாகத்தில் களப்பணியாளா்களிடம் பேசிய அவா், வீடுவீடாக மேற்கொள்ளும் சளி, காய்ச்சல், இருமல், உடல் வெப்பநிலை கண்டறியும் பணிகளை உடனடியாக கள ஆய்வுப் பதிவேடுகளில் பதிவு செய்திட வேண்டும் என்றாா்.

பின்னா் மத்திய மண்டலத்துக்கு உள்பட்ட சத்தி சாலையில் அமைந்துள்ள குப்பை மாற்று நிலையம், கிழக்கு மண்டலம் நஞ்சுண்டாபுரம் பகுதியில் 40 எம்.எல்.டி. கொள்ளளவு கொண்ட கழிவுநீா் சுத்திகரிப்பு நிலையம் கட்டுமானப் பணிகளை பாா்வையிட்டு ஆய்வு நடத்தினாா். அப்போது, பணிகளை விரைவில் முடிக்குமாறு அலுவலா்களுக்கு உத்தரவிட்டாா்.

ஆய்வின்போது, மாநகராட்சி பொறியாளா் லட்சுமணன், மண்டல உதவி ஆணையா் மோகனசுந்தரி, உதவி செயற்பொறியாளா்கள் செந்தில்பாஸ்கா், உமாதேவி உள்ளிட்ட மாநகராட்சி அலுவலா்கள் உடனிருந்தனா்.