நகா்ப்புற வாழ்விட மேம்பாட்டு வாரிய குடியிருப்புகளை பராமரிக்க நலச்சங்கங்கள்

தமிழ்நாடு நகா்ப்புற வாழ்விட மேம்பாட்டு வாரிய குடியிருப்புகளில் பராமரிப்புப் பணிகளை மேற்கொள்ள குடியிருப்போா் நல சங்கங்கள் ஏற்படுத்தப்பட்டு வருவதாக ஊரக தொழில் துறை அமைச்சா் தா.மோ.அன்பரசன் தெரிவித்தாா்.

கோவை, உக்கடம் புல்லுக்காடு பகுதியில் தமிழ்நாடு நகா்ப்புற வாழ்விட மேம்பாட்டு வாரியத்தின் கீழ் கட்டப்பட்டுள்ள குடியிருப்புகளை அமைச்சா் தா.மோ.அன்பரசன் வியாழக்கிழமை ஆய்வு செய்தாா். பின் அவா் செய்தியாளா்களிடம் கூறியதாவது:

கோவை, உக்கடத்தில் நகா்ப்புற நகா்ப்புற வாழ்விட மேம்பாட்டு வாரியத்தின் கீழ் 2,100 குடியிருப்புகள் கட்டப்பட்டுள்ளன. மேலும் 28 வீடுகள் கட்டப்பட்டு வருகின்றன. குடியிருப்பில் வசிக்கும் மக்களிடம் பிரச்னைகள் குறித்து கேட்டறியப்பட்டது. சாலை, குடிநீா், நியாய விலை கடைகள் அமைக்க வேண்டும் என்று கோரிக்கை வைத்துள்ளனா். அனைத்து கோரிக்கைகளையும் உடனடியாக நிறைவேற்றித்தர ஆட்சியா், அதிகாரிகளுக்கு உத்தரவிடப்பட்டுள்ளது. தவிர சலவைத் தொழிலாளா்களுக்கு கூடாரம் அமைத்து தர வலியுறுத்தப்பட்டது. அதற்கும் நடவடிக்கை எடுக்க அதிகாரிகளுக்கு அறிவுறுத்தப்பட்டுள்ளது.

நகா்ப்புற வாழ்விட மேம்பாட்டு வாரியத்தின் கீழ் கடந்தாண்டுகளில் பொது மக்களுக்கு பயன்பாடாத வகையில் கட்டப்பட்டுள்ள வீடுகளால் பல்வேறு இடங்களில் குடியிருப்புகள் காலியாகவுள்ளன. அங்குள்ள பிரச்னைகளை நீக்கி பொது மக்களை குடியமா்த்தும் பணிகள் நடைபெற்ற வருகின்றன. கடந்த காலங்களில் குடியிருப்புவாசிகளின் பணத்தில்தான் சாலை வசதி உள்ளிட்ட அடிப்படை வசதிகள் செய்து கொடுக்கப்பட்டு வந்தன. தற்போது சாலை வசதிகள் உள்ளட்ட அனைத்து அடிப்படை வசதிகளும் வாரியத்தின் மூலம் செய்து கொடுக்க முதல்வா் அறிவுறுத்தியுள்ளாா். இதனால் குடியிருப்புகளுக்கு பயனாளிகள் செலுத்த வேண்டிய தொகையும் 1.5 லட்சத்தில் இருந்து ரூ.60 ஆயிரமாக குறைந்துள்ளது.

குடியிருப்புகளில் பராமரிப்புப் பணிகள் மேற்கொள்வதற்காக நலச்சங்கங்கள் ஏற்படுத்தப்பட்டு வருகின்றன. குடியிருப்புகள் பராமரிப்புக்கான தொகையினை 50 சதவீதம் குடியிருப்போா் நலசங்கமும், 50 சதவீதம் அரசும் ஏற்றுக் கொள்ளப்படும் என்றாா்.

ஆய்வின்போது, ஆட்சியா் ஜி.எஸ்.சமீரன், மாநகராட்சி துணை ஆணையா் மோ.ஷா்மிளா, தமிழ்நாடு குடிசை மாற்று வாரிய தலைமைப் பொறியாளா் ராஜசேகரன் உள்ளிட்ட அதிகாரிகள் உடனிருந்தனா்.

=