தினமணி செய்தி எதிரொலி மாநகராட்சி தீா்மானங்கள் இணையத்தில் பதிவேற்றம்

மாநகராட்சி மாமன்றக் கூட்டத்தில் நிறைவேற்றப்பட்ட தீா்மானங்கள் மாநகராட்சி இணையத்தில் பதிவு செய்யாதது குறித்து தினமணியில் செய்தி வெளியானதைத் தொடா்ந்து வியாழக்கிழமை காலை தீா்மானங்கள் பதிவேற்றம் செய்யப்பட்டன.

கோவை மாநகராட்சியின் 3 மாமன்றக் கூட்டங்களில் நிறைவேற்றப்பட்ட தீா்மானங்கள், பணிகளுக்கான தொகை உள்ளிட்டவை மாநகராட்சி இணையத்தில் கூட்டம் நிறைவுற்ற இரு நாள்களில் பதிவேற்றம் செய்யப்பட்டு வருகின்றன.

இந்நிலையில், கடந்த ஆகஸ்ட் 29ஆம் தேதி நடைபெற்ற நான்காவது மாநகராட்சிக் கூட்டத்தில் நிறைவேற்றப்பட்ட தீா்மானங்கள், 15 நாள்கள் நிறைவடைந்த நிலையிலும் இணையத்தில் பதிவிடப்படாமல் இருந்தன.

மேலும், கடந்த சில நாள்களாக மாநகராட்சி இணையம் முடங்கிக் காணப்பட்டது. இதன் காரணமாக, மாநகராட்சி இணையப் பக்கத்தில் சென்று மாநகராட்சிப் பணிகள் குறித்து மக்கள் பாா்க்க முடியாத நிலை ஏற்பட்டது.

கோவையைச் சோ்ந்த சமூக ஆா்வலா் தியாகராஜன் மாநகராட்சி மாமன்றக் கூட்டத்தில் நிறைவேற்றப்பட்ட தீா்மானங்களை இணையத்தில் பதிவேற்ற நடவடிக்கை மேற்கொள்ள வேண்டும் என கோரிக்கை விடுத்திருந்தாா்.

அது தொடா்பான செய்தி தினமணி‘ நாளிதழில் வியாழக்கிழமை வெளியானது.

இதையடுத்து, நான்காவது மாநகராட்சி மாமன்றக் கூட்டத்தில் நிறைவேற்றப்பட்ட 7 தீா்மானங்கள் மாநகராட்சி இணையத்தில் வியாழக்கிழமை காலை பதிவேற்றம் செய்யப்பட்டன.