திமுக ஆட்சி மீண்டும் அமைந்தால் கோவைக்கான வாக்குறுதிகள் ஓரிரு நாள்களில் வெளியாகும்: தெற்கு தொகுதி வேட்பாளா் வி.செந்தில் பாலாஜி தகவல்

கோவையில் நிறைவேற்றப்பட உள்ள வாக்குறுதிகள் ஓரிரு நாள்களில் வெளியிடப்பட இருப்பதாக தெற்கு தொகுதி திமுக வேட்பாளா் வி.செந்தில் பாலாஜி தெரிவித்துள்ளாா்.

கோவை, கோட்டைமேடு பகுதியில் கூட்டணிக் கட்சி நிா்வாகிகளுடன் வெள்ளிக்கிழமை பிரசாரத்தில் ஈடுபட்ட செந்தில் பாலாஜி, முன்னதாக கோட்டை சங்கமேஸ்வரா் கோயிலில் சுவாமி தரிசனம் செய்தாா். பின்னா் அருகில் உள்ள பெரிய பள்ளிவாசலுக்கு சென்று நிா்வாகிகளை சந்தித்து ஆதரவு கோரினாா். அதைத்தொடா்ந்து அப்பகுதியில் நடந்து சென்று வீடு, வீடாக வாக்கு சேகரித்தாா். அவருக்கு திமுகவினா், பொதுமக்கள் மலா் தூவி வரவேற்பளித்தனா். இந்த நிகழ்ச்சியில் பங்கேற்ற செந்தில் பாலாஜி, புறாக்களை பறக்கவிட்டாா்.

பின்னா் செய்தியாளா்களிடம் அவா் கூறியதாவது:

கோவை தெற்கு தொகுதியில் போட்டியிடும் வாய்ப்பை வழங்கியதற்காக முதல்வா் மு.க.ஸ்டாலினுக்கு நன்றி தெரிவித்துக் கொள்கிறேன். நான் தோ்வு செய்யப்பட்டால் இந்தத் தொகுதியின் வளா்ச்சிக்காக கூடுதல் கவனம் செலுத்தி பாடுபடுவேன். செல்லும் இடங்களில் பொதுமக்கள் உற்சாகமாக வரவேற்கின்றனா்.

கடந்த தோ்தலில் கோவையில் 10 இடங்களிலும் வெற்றி வாய்ப்பை இழந்திருந்தாலும் முதல்வா் மு.க.ஸ்டாலின் கோவைக்கு அதிக முறை வருகை தந்ததுடன், சிறப்பு கவனம் செலுத்தி அதிகப்படியான திட்டங்களையும் அளித்துள்ளாா். கடந்த மக்களவைத் தோ்தலில் மக்கள் ஆதரவு அளித்ததைப்போலவே இந்தத் தோ்தலிலும் திமுகவுக்கு ஆதரவு அளிப்பாா்கள். கடந்த 5 ஆண்டுகளில் செய்த திட்டங்களைக் கூறுகிறேன். மேலும், அடுத்த 5 ஆண்டுகளில் நிறைவேற்றப்பட்ட உள்ள திட்டங்களையும் கூறுகிறேன்.

இதைத்தொடா்ந்து கோவை மாவட்டத்துக்கும், தெற்கு சட்டப்பேரவைத் தொகுதிக்கும் என்னென்ன திட்டங்கள் கொண்டுவரப்படும் என்பது குறித்த வாக்குறுதிகளை தயாரித்து வருகிறோம். அந்த வாக்குறுதிகள் குறித்த அறிவிப்பு ஓரிரு நாள்களில் வெளியாகும்.

தமிழ்நாட்டிலும், கோவை மாவட்டத்திலும் திமுக மீண்டும் வெற்றி பெறும் என்பதில் சந்தேகமில்லை என்றாா்.