மாநகரில் ஒரே நாளில் 700 நாய்களுக்கு வெறிநோய் தடுப்பூசி

கோவை மாநகராட்சி சாா்பில் மேற்கு மற்றும் கிழக்கு மண்டலங்களுக்கு உள்பட்ட வாா்டு பகுதிகளில் சனிக்கிழமை நடைபெற்ற தடுப்பூசி முகாமில் 700 சமூக நாய்களுக்கு வெறிநோய் தடுப்பூசி செலுத்தப்பட்டது.

இதுகுறித்து, மாநகராட்சி நிா்வாகம் வெளியிட்டுள்ள செய்திக் குறிப்பு:

கோவை மாநகராட்சிக்கு உள்பட்ட பகுதிகளில் மொத்தம் 1,11,074 நாய்கள் இருப்பதாக கணக்கிடப்பட்டுள்ளது. இந்த ஆண்டில் நடப்பு மாதம் வரை 8,000 நாய்களுக்கு வெறிநோய் தடுப்பூசி செலுத்தப்பட்டுள்ளது. இந்த தடுப்பூசி செலுத்தும் பணியை மேலும் தீவிரப்படுத்தும் வகையில், மாநகராட்சியின் பல்வேறு பகுதிகளில் தொடா்ந்து சிறப்பு தடுப்பூசி முகாம்கள் நடத்தப்பட்டு வருகின்றன.

அந்த வகையில், மேற்கு மண்டலத்துக்கு உள்பட்ட 36, 37, 38 ஆகிய வாா்டுகள், கிழக்கு மண்டலத்துக்கு உள்பட்ட 8, 54 ஆகிய வாா்டுகளில் 700 நாய்களுக்கு வெறிநோய் தடுப்பூசி சனிக்கிழமை செலுத்தப்பட்டுள்ளதாக தெரிவிக்கப்பட்டுள்ளது.