பொள்ளாச்சி, உடுமலை வழியாக மங்களூரு - ராமேசுவரம் இடையே ஒருவழிச் சிறப்பு ரயில்

விஜயதசமியை முன்னிட்டு, மங்களூரில் இருந்து ராமேசுவரத்துக்கு பொள்ளாச்சி, உடுமலை வழித்தடத்தில் ஒருவழிச் சிறப்பு ரயில் இயக்கப்பட உள்ளதாகத் தெரிவிக்கப்பட்டுள்ளது.

இது குறித்து பாலக்காடு ரயில்வே கோட்ட நிா்வாகம் வெளியிட்டுள்ள செய்திக் குறிப்பு: விஜயதசமியையொட்டி, மங்களூரு ரயில் நிலையத்தில் இருந்து திங்கள்கிழமை (அக்டோபா் 19) காலை 4.15 மணிக்குப் புறப்படும் மங்களூரு - ராமேசுவரம் ஒருவழிச் சிறப்பு ரயில் (எண்: 06142) அன்று இரவு 7.30 மணிக்கு ராமேசுவரம் நிலையத்தைச் சென்றடையும்.

இந்த ரயில் பையனூா், கண்ணூா், தலச்சேரி, வடகரா, கோழிக்கோடு, திரூா், ஷொரணூா், பாலக்காடு, கொல்லங்கோடு, பொள்ளாச்சி, உடுமலை, பழநி, ஒட்டன்சத்திரம், திண்டுக்கல், மதுரை, மானாமதுரை, பரமக்குடி, ராமநாதபுரம் உள்ளிட்ட நிலையங்களில் நின்று செல்லும் எனத் தெரிவிக்கப்பட்டுள்ளது.