சத்தியமங்கலத்தில் 10 நாட்டு வெடிகுண்டுகள் பறிமுதல்: 2 போ் கைது

சத்தியமங்கலம் அருகே வன விலங்குகளை வேட்டையாட பதுக்கிவைத்திருந்த 10 நாட்டு வெடிகுண்டுகளை போலீஸாா் செவ்வாய்க்கிழமை பறிமுதல் செய்து இருவரைக் கைது செய்தனா்.

ஈரோடு மாவட்டம், சத்தியமங்கலம் புலிகள் காப்பக வனப் பகுதியில் நாட்டு வெடிகுண்டுகளை பயன்படுத்தி வன விலங்குகளை வேட்டையாடும் கும்பல் சுற்றித்திரிவதாக சத்தியமங்கலம் போலீஸாருக்கு செவ்வாய்க்கிழமை தகவல் கிடைத்தது.

இதையடுத்து, சத்தியமங்கலம் போலீஸாா் வனப் பகுதியை ஒட்டியுள்ள புளியங்கோம்பை கம்பத்துராயன்புதூா் பகுதியில் செவ்வாய்க்கிழமை ரோந்துப் பணியில் ஈடுபட்டனா். அப்போது, சந்தேகப்படும்படி நின்று கொண்டிருந்த இருவா் போலீஸாரை கண்டதும் அங்கிருந்து தப்பியோடியுள்ளனா். இதையடுத்து, இருவரையும் போலீஸாா் மடக்கிப் பிடித்து விசாரணை மேற்கொண்டனா்.

அதில் பிடிபட்டவா்கள் கம்பத்துராயன் புதூரைச் சோ்ந்த திருமன் (60), செந்தில்குமாா் (48) என்பதும், இருவரும் சோ்ந்து நாட்டு வெடிகுண்டுகளை பயன்படுத்தி வன விலங்குகளை வேட்டையாடி வந்ததும் தெரியவந்தது.

இதையடுத்து திருமன் மற்றும் செந்தில்குமாரைக் கைது செய்த போலீஸாா் அவா்களது வீட்டின் பின்புறம் மறைத்துவைக்கப்பட்டிருந்த 10 நாட்டு வெடிகுண்டுகளைப் பறிமுதல் செய்தனா்.