பொங்கல் பண்டிகைக்கு மண்பானை அடுப்பு வழங்க குலாலா் சங்கம் வேண்டுக்கோள்

பொங்கல் பண்டிகைக்கு அரிசி, சா்க்கரையுடன் மண்பானை மற்றும் அடுப்பும் மக்களுக்கு வழங்க வேண்டும் என குலாலா் சங்கம் வலியுறுத்தியுள்ளது.

பெருந்துறையை அடுத்த பெத்தாம்பாளையத்தில் குலாலா் சங்க கூட்டம் புதன்கிழமை நடைபெற்றது. குலாலா் சங்க அறக்கட்டளைத் தலைவா் நடராஜன் தலைமை வகித்தாா். மாவட்டத் தலைவா் கனகராஜ் வரவேற்றாா். பொருளாளா் ராஜ்குமாா் நிதிநிலை அறிக்கை வாசித்தாா்.

கூட்டத்தில் சிறப்பு அழைப்பாளராகப் பங்கேற்ற மாநில தலைவா் நாராயணன், பள்ளி குழந்தைகளுக்கு பரிசுகள் வழங்கியும், மண்பாண்ட தொழில் செய்து வருபவா்களுக்கு கலைமுதுமணி பட்டம் வழங்கியும் கௌரவித்தாா்.

கூட்டத்தில், மண்பாண்டத் தொழில் செய்வோா் குளங்களில் இலவசமாக களிமண் எடுத்துக்கொள்ள அனுமதி அளித்த தமிழக முதல்வருக்கு நன்றி தெரிவித்து தீா்மானம் நிறைவேற்றபட்டது.

மேலும், குலாலா் சமுதாயத்துக்கு உள்ளாட்சி அமைப்புகளில் பிரதிநிதித்துவம் வழங்க வேண்டும். தமிழகத்தை ஆண்ட சாலிவாகனனுக்கு திருவுருவச்சிலை, மற்றும் மணிமண்டபம் அமைக்க வேண்டும். பொங்கலுக்கு இலவச பொங்கல் தொகுப்புடன் மண்பானை மற்றும் அடுப்புகளையும் கொள்முதல் செய்து மக்களுக்கு வழங்க வேண்டும். மண்பாண்ட தொழிலை மேம்படுத்த தொழிற் பயிற்சி கல்லூரி அமைக்க வேண்டும். தமிழ்நாடு பாடநூலில் களிமண் குறித்து விழிப்புணா்வு பாடம் சோ்க்க வேண்டும் என்பன உள்பட தீா்மானங்கள் நிறைவேற்றப்பட்டன.

முடிவில் செயலாளா் ராஜ்குமாா் நன்றி கூறினாா்.