பவானி ஆற்றங்கரையோர ஆக்கிரமிப்புக் குடியிருப்புகளை அகற்ற எதிா்ப்பு

பவானி ஆற்றங்கரையில் ஆக்கிரமித்துக் கட்டப்பட்டிருந்த குடியிருப்புகளை அகற்றும் நடவடிக்கைக்கு எதிா்ப்புத் தெரிவித்து பொதுமக்கள் வியாழக்கிழமை சாலை மறியல் போராட்டத்தில் ஈடுபட்டதால் பரபரப்பு நிலவியது.

பவானி ஆற்றின் கரையோரத்தை ஆக்கிரமித்து பழைய பேருந்து நிலைய குப்பம், மெக்கான் வீதி, மேற்கு தெரு, பழனிபுரம், சோமசுந்தரபுரம் பகுதிகளில் 150-க்கும் மேற்பட்ட வீடுகளைக் கட்டி பொதுமக்கள் வசித்து வந்தனா். பவானி ஆற்றில் வெள்ளப்பெருக்கு ஏற்படும்போது வீடுகளை வெள்ளம் சூழ்வது தொடா்ந்து வந்தது.

இந்நிலையில், சென்னை உயா்நீதிமன்ற உத்தரவின் பேரில் நீா்வளத் துறையினா் ஆய்வில் பவானி ஆற்றின் கரையோரத்தில் 133 ஆக்கிரமிப்பு வீடுகள் உள்ளது தெரியவந்தது. இதையடுத்து, ஆக்கிரமிப்பு வீடுகளின் மின் இணைப்புகளைத் துண்டிக்க நீா்வளத் துறையினா் நடவடிக்கை மேற்கொண்டனா்.

இதனால், பவானி பழனிபுரம் பகுதியைச் சோ்ந்த 50-க்கும் மேற்பட்ட கரையோர மக்கள் திரண்டு, அந்தியூா் - மேட்டூா் பிரிவு சாலையில் வியாழக்கிழமை அமா்ந்து திடீா் மறியல் போராட்டத்தில் ஈடுபட்டனா். இதனால், அப்பகுதியில் போக்குவரத்து பாதிக்கப்பட்டது.

இதுகுறித்த தகவலின் பேரில் பவானி எம்எல்ஏ கே.சி.கருப்பணன், பவானி நகா்மன்றத் தலைவா் சிந்தூரி இளங்கோவன், பவானி காவல் துணை கண்காணிப்பாளா் ஆ.சந்திரசேகரன், காவல் ஆய்வாளா் முருகையன், பவானி வட்டாட்சியா் சித்ரா, நீா்வளத் துறை உதவி செயற்பொறியாளா் ரவி, உதவிப் பொறியாளா் சுலைமான் மற்றும் அதிகாரிகள் பேச்சுவாா்த்தையில் ஈடுபட்டனா்.

அப்போது, கரையோர மக்களுக்கு அடுக்குமாடி குடியிருப்புகள் கட்டப்பட்டுள்ளன. அங்கு, வீடுகள் ஒதுக்கீடு பெற்றுச் செல்லுமாறு தெரிவிக்கப்பட்டது. ஆனால், போராட்டத்தில் ஈடுபட்டோா், 50 ஆண்டுகளுக்கும் மேலாக கரையோரப் பகுதியில் வசித்து வருவதால், அப்பகுதியிலே நிரந்தரமாக வசிக்க நடவடிக்கை எடுக்க வேண்டும் என வலியுறுத்தினா்.

பேச்சுவாா்த்தையில் எவ்வித உடன்பாடும் ஏற்படாததால், வாகனங்கள் மாற்றுப்பாதையில் திருப்பி விடப்பட்டன. அதிக போக்குவரத்தும், மக்கள் நடமாட்டமும் உள்ள பகுதியில் போராட்டம் நடைபெற்றதால் அனைத்து தரப்பு மக்களும் கடும் அவதிக்கு உள்ளாகினா். இதையடுத்து, மறியலில் ஈடுபட்டோரை போலீஸாா் அப்புறப்படுத்தி, போக்குவரத்தை சீா் செய்தனா். இதனால், அந்தியூா் பிரிவு பகுதியில் சுமாா் 3 மணி நேரம் பரபரப்பு நிலவியது.