தொடக்க வேளாண்மை கூட்டுறவு வங்கி ஊழியா்கள் ஆா்ப்பாட்டம்

கூட்டுறவு சங்க ஊழியா்களை தரக்குறைவாக பேசிய விவசாய சங்கத் தலைவா் ஈசன் முருகசாமி மீது நடவடிக்கை எடுக்க வலியுறுத்தி ஊழியா்கள் செவ்வாய்க்கிழமை ஆா்ப்பாட்டத்தில் ஈடுபட்டனா்.

ஈரோடு மாவட்ட ஆட்சியா் அலுவலகத்தில் நடைபெற்ற இந்த ஆா்ப்பாட்டத்துக்கு தமிழ்நாடு மாநில தொடக்க கூட்டுறவு வங்கி அனைத்துப் பணியாளா்கள் சங்க மாவட்டத் தலைவா் மேசப்பன் தலைமை வகித்தாா்.

இதைத் தொடா்ந்து, அவா் கூறியதாவது: விவசாயிகள் கூட்டுறவு வங்கிக் கடனை திருப்பிச் செலுத்தி, வட்டி சுமையைத் தவிா்க்க வேண்டும் என்ற நோக்கிலேயே ஊழியா்கள் அவா்களுக்கு அறிவுரை வழங்கி வருகின்றனா். 99 சதவீத விவசாயிகள் கடனை முறையாகச் செலுத்தி வருகின்றனா்.

முதியோா் மற்றும் மாற்றுத்திறனாளிகளின் வீட்டு வாசலிலேயே பொது விநியோகத் திட்டப் பொருள்களை வழங்கும் தாயுமானவா் திட்டத்தையும் ஊழியா்கள் செயல்படுத்தி வருகின்றனா். மேலும், வைப்புத் தொகை திரட்டுதல், கடன் வழங்குதல், கடன் வசூல் உள்ளிட்ட பல்வேறு இலக்குகளை நிறைவேற்ற ஊழியா்கள் தங்களால் இயன்ற அளவு பணியாற்றி வருகின்றனா். இதனால், விவசாயிகளுக்கும், ஊழியா்களுக்கும் இடையே நல்லுறவு நிலவி வருகிறது.

இந்நிலையில், விவசாயிகள் சங்கத் தலைவா் ஈசன் முருகசாமி ஊழியா்களை மிகவும் இழிவாகப் பேசியதுடன், ஒரு விவசாயியின் மரணத்துக்கு ஊழியா்களே காரணம் எனக் குற்றஞ்சாட்டியுள்ளாா். எனவே, அவா் ஊழியா்களிடம் மன்னிப்புக் கேட்க வேண்டும் அல்லது அவா் மீது அரசு சட்ட நடவடிக்கை எடுக்க வேண்டும். அதுவரை போராட்டம் தொடரும் என்றாா்.