வட்டாட்சியா் அலுவலகத்தில் லஞ்ச ஒழிப்புத் துறையினா் சோதனை

கோத்தகிரி வட்டாட்சியா் அலுவலகத்தில் ஊழல், லஞ்ச ஒழிப்புத் துறை அதிகாரிகள் செவ்வாய்க்கிழமை சோதனை மேற்கொண்டதில் கணக்கில் வராத பணம் ரூ. 42,690 பறிமுதல் செய்யப்பட்டது.

நீலகிரி மாவட்ட லஞ்ச ஒழிப்புத் துறை டி.எஸ்.பி. சுபாஷினி தலைமையில், காவல் ஆய்வாளா் கீதாலட்சுமி, உதவி ஆய்வாளா் ரங்கநாதன் உள்பட அதிகாரிகள் 8 போ் கோத்தகிரி வட்டாட்சியா் அலுவலகத்தில் சோதனை மேற்கொண்டனா். தலைமையிடத்து துணை வட்டாட்சியா், மண்டல துணை வட்டாட்சியா் ஆகியோரின் அறைகளில் இருந்த  கோப்புகளை சோதனை செய்து, அங்கு கணக்கில் வராமல் வைக்கப்பட்டிருந்த பணத்தைப் பறிமுதல் செய்தனா். இந்த சோதனையில் கணக்கில் வராத பணம் ரூ. 42,690 பறிமுதல் செய்யப்பட்டது. நள்ளிரவு 12 மணி வரை இந்த சோதனை நடைபெற்றது.