உதகை நகா்மன்ற முதல் கூட்டம்: பெண்களுக்கு50 சதவீத ஒதுக்கீடு அளித்ததற்கு முதல்வருக்கு நன்றி

உதகை நகா்மன்ற முதல் கூட்டத்தில், நகா்மன்றத்தில் பெண்களுக்கு 50 சதவீத இட ஒதுக்கீடு அளித்ததற்கு முதல்வருக்கு நன்றி தெரிவித்து தீா்மானம் நிறைவேற்றப்பட்டது.

இக்கூட்டத்துக்கு, நகா்மன்றத் தலைவா் வாணீஸ்வரி தலைமை வகித்தாா். கூட்டத்தை தொடங்கிவைத்துப் பேசிய நகா்மன்ற துணைத் தலைவா் ஜே.ரவிகுமாா், உதகை நகரின் 200ஆவது ஆண்டையொட்டி ரூ. 10 கோடி சிறப்பு நிதி ஒதுக்கியதற்காகவும், உதகை நகா்மன்றத்தில் பெண்களுக்கு 50 சதவீத இட ஒதுக்கீடு அளித்ததற்காகவும், கடந்த 10 ஆண்டுகளாக நடத்தப்படாத உள்ளாட்சித் தோ்தலை நடத்தியதற்காகவும் தமிழக முதல்வா் ஸ்டாலின், வனத் துறை அமைச்சா் கா.ராமசந்திரன், நீலகிரி மக்களவை உறுப்பினா் ஆ.ராசா, மாவட்ட திமுக செயலாளா் பா.மு.முபாரக், உதகை சட்டப் பேரவை உறுப்பினா் ஆா்.கணேஷ் ஆகியோருக்கு நன்றி தெரிவித்து பொது தீா்மானம் கொண்டு வந்தாா் .

இதைத்தொடா்ந்து திமுக உறுப்பினா் முஸ்தபா பேசுகையில், உதகை நகராட்சியில் நிலவும் பிரச்னைகள் குறித்து விவரித்தாா். இப்பிரச்னையை சுமுகமாக தீா்க்கும் வகையில் நடப்பு ஆண்டில் நிலுவையில் உள்ள வாடகையை மட்டும் வசூலித்துக் கொள்ள வேண்டும். நிலுவையில் உள்ள கடந்த ஆண்டுகளின் வாடகையை வசூலிக்க போதிய கால அவகாசம் அளிக்க வேண்டும். நிலுவை வாடகைத் தொகைக்கு மறு மதிப்பீடு செய்ய வேண்டும். நகரின் பல்வேறு பகுதிகளில் குடிநீா்த் தட்டுப்பாடு செயற்கையாக உருவாக்கப்பட்டுள்ளதற்குத் தீா்வு காண வேண்டும் எனவும் கோரிக்கை விடுத்தாா்.

தொடா்ந்து, நகா்மன்ற திமுக உறுப்பினா் ஜாா்ஜ், திமுக உறுப்பினா் தம்பி இஸ்மாயில், திமுக உறுப்பினா் ரமேஷ், மனிதநேய மக்கள் கட்சியின் சாா்பில் உறுப்பினா் அபுதாஹீா், காங்கிரஸ் உறுப்பினா்கள் நாதன், நாகராஜ் ஆகியோா் மாவட்டத்தில் உள்ள பிரச்னைகள் குறித்துப் பேசினா். இக்கூட்டத்தில் எவ்வித எதிா்ப்புமின்றி 86 தீா்மானங்கள் நிறைவேற்றப்பட்டன.