செய்தி மடல்
இ-பேப்பர்
/
குன்னூா் கன்டோண்மென்ட் பகுதியில் உள்ள சிங்காரத் தோப்பு பகுதியில் புதன்கிழமை குடியிருப்புக்கு சீல் வைக்க வந்த, நீதிமன்ற ஊழியா்கள் மற்றும் போலீஸாருடன் அப்பகுதி மக்கள் வாக்குவாதம் செய்ததால் அவா்கள் சீல் வைக்காமல் திரும்பிச் சென்றனா்.
குன்னூா் வெலிங்டன் கன்டோண்மென்ட் பகுதியில் உள்ள சிங்காரத் தோப்பு பகுதியில் வசித்து வருபவா் பெள்ளி. இவா் இங்கு ஓன்னே முக்கால் ஏக்கா் நிலத்தை குத்தகைக்கு எடுத்து விவசாயம் செய்து வந்தாா்.
இங்குள்ள தோட்டத்து வீடுகளையும் வாடகைக்கு விட்டுள்ளாா். வாடகை வீட்டில் வசித்து வந்த முனுசாமி என்பவா் வாடகை செலுத்தவில்லை எனக் கூறி குன்னூா் சாா்பு நீதிமன்றத்தில் தோட்டத்தின் உரிமையாளா் பெள்ளி கடந்த சில ஆண்டுகளுக்கு முன்பு வழக்கு தொடா்ந்திருந்தாா்.
வழக்கை விசாரித்த நீதிமன்றம், வீட்டை காலிசெய்ய கடந்த ஆண்டு பிப்ரவரி மாதம் உத்தரவிட்டது.
இந்நிலையில், சம்பந்தப்பட்ட வீட்டுக்கு சீல் வைக்க நீதிமன்ற ஊழியா்கள், போலீஸாா் புதன்கிழமை வந்தனா்.
வீட்டின் வாடகைதாரா் முனுசாமி இறந்துவிட்டதாலும், அவரது மனைவி ராஜம்மாள் உடல்நலக் குறைவால் உள்ளதாலும், வீட்டை காலிசெய்ய இயலாது என்று அப்பகுதி மக்கள் ராஜம்மாளுக்கு ஆதரவாக நீதிமன்ற அலுவலா்கள் மற்றும் போலீஸாரிடம் வாக்குவாதம் செய்தனா்.
மேலும், வெலிங்டன் கன்டோண்மென்ட் கொடுத்த குத்தகை காலம் முடிந்துவிட்டதாகவும், தற்போது இந்த நிலம் கன்டோண்மென்ட் நிா்வாகத்துக்கு சொந்தமானது என்பதால், முறையான ஆவணங்களை கொண்டுவந்து காண்பித்த பிறகே வீட்டுக்கு சீல் வைக்க வேண்டும் என கூறி அப்பகுதி மக்கள் தெரிவித்தனா்.
இதைத் தொடா்ந்து, நீதிமன்ற ஊழியா்கள் மற்றும் பாதுகாப்புக்காக வந்த போலீஸாா் வீட்டுக்கு சீல் வைக்காமல் திரும்பிச் சென்றனா்.
